Jyl muǵalimi jeńimpazy ushaq apatynan qalaı aman qaldy?
Almatydaǵy №123 mektep gımnazııasy dırektorynyń orynbasary Nazym Abaǵanova Jyl Muǵalimi respýblıkalyq baıqaýynyń jeńimpazy ataǵyna laıyq dep tanylǵan. Pedagog Nur-Sultanǵa marapattaý sharasyna qatysýǵa shyqqan.
«Ushaqqa bılet birazǵa deıin tabylmady. Osy bılet arzan tabylǵanda qatty qýandym. Tańǵy 3-4 shamasynda kúıeýim áýejaıǵa shyǵaryp saldy. Túk bolmaǵandaı avtobýsqa otyrdyq. Eshqandaı sezim bolmady. Ushaq qozǵalǵanda men uıyqtap ketippin. Sol kezde ushaq bir ret jerge soǵylypty. Ony men uıyqtap otyryp baıqamappyn. Bir ýaqytta ushaq ekpinmen zymyraı jóneldi. Áýege kóterilgende ushaq bir jaqqa qaraı qısaıa bastady. Salon tarsyldap, dirildep ketti. Sol kezde arttaǵylar «nege birinshi tars etkende toqtamady myna pılot» dep aıtyp jatty. Sodan keıin 5 mınýt ótti me, ótpedi me, bilmeımin. Men otyrǵan qanat jaǵy syryldap jerge tıip, ushqyn shyǵaryp kele jatty. Tars etken dybys shyqty. Kózimdi ashsam týra qarsy aldymda temir me, beton ba, birdeńe. Men 13 orynda otyrǵan edim. Maǵan 30 sm jetpeı toqtady. Sol kezdegi qorqynyshty aıtyp jetkizý múmkin emes. Men óldim dep oıladym. Bir kıno sııaqty, tús sııaqty. Bir ýaqytta tóbemizdegi bagajdar qulaı bastady. «Tez shyǵyńdar, jarylady» dep aıqaılap jatty. Bireýler shyńǵyryp jalynyp jatty qutqaryńdar dep», - dedi muǵalim.
Nazym Mamyrbekqyzy ushaqtyń oń jaǵyndaǵy esikten áýpirimdep shyǵyp úlgeredi. Jerge sekirip túskende aıaǵyn temir syryp ketken. Basqa jaraqattan din aman qalǵan.
«Men de jarylady degendi estip, ketip qalsam degen oı boldy. Biraq aıaǵym bastyrmady. Áreń tústim de, dirildep, oppa qarmen uzaı berdim. Qulaǵym tars bitelip qalǵan. Shok. Adamdar shamalary kelgenshe túsip, jan jaqqa bytyrap beti aýǵan jaqqa ketip jatty. Bir esimdi jısam, ushaq ushatyn jolǵa shyǵyp ketippiz. Sary jılet kıgender aıqaılap, qaıtyńdar samolet myjyp ketedi dep shaqyryp aldy. Áıteýir keldik. Sol kezde bizge avtobýs kelip, aeroportqa alyp ketti. Kúıeýime birden zvondap, samolet usha almaı qaldy dedim. Katastrofa boldy dep aıtpadym. Áýejaıǵa kelgende bizge medıkter, jedel járdem psıhologtar kómektese bastady», - dedi Nazym Abaǵanova.
Jyl muǵalimi ataǵynyń jeńimpazy sol kúngi qorqynyshtan áli esin jııa almaı júrgenin aıtty.
