Jyl qorytyndysy. Fýtboldan Astana birinshiligi

Biraq solardyń ishinde shoqtyǵy bıigi - Fýtboldan áýesqoılar arasyndaǵy Astana qalasynyń birinshiligi.

«Astana-1964» atoı salǵan maýsym

2015 jyldyń 27 jeltoqsanynda bastalǵan Astana qalasynyń qysqy birinshiligine 13 komanda qatysqan. Arasynda «Zenıt», «Shkolnık», «Art Prınt», «Tselınograd» syndy debıýtanttar da boldy. Barlyq oıyn «Astana-Arena» stadıonynda ótip, qala birinshiliginiń barysynan kásipqoı fýtbolshylardy da kórip qalatynbyz. Bul qysqy maýsymnyń ereksheligi ǵoı. Kásipqoı fýtbolshylarǵa da qatysýǵa ruqsat. Sondyqtan, bastapqy týrlarda Islambek Qýat «Shkolnık» sapynda oıqastap júrse, kásipqoı karerasyn keshe ǵana aıaqtaǵan Maksım Jalmaǵambetov osy komandada bastan-aıaq oınady. Áli de dop teýip, «Shkolnıkti» alǵa jetelep júr. Birer ýaqyt «Dostardyń» namysyn Murat Tileshev, Aıdar Kúmisbekov, Murat Súımaǵambetov, Anton Chıchýlın syndy myqtylar qorǵady. Ardagerlerden quralǵan «Tselınnıktiń» sapynda Konstantın Kotovtan bastap, Marat Ysqaqov, Sergeı Kalıýbın, Aleksandr Lısın, Vladımır Glevıch, Igor Basmanov syndy kezinde Aqmola fýtbolyn aıaqqa turǵyzyp, Qazaqstan arenasynda atoı salǵan ardagerler oınady.

Al chempıonat «Zenıttiń» qarqyndylyǵymen este qaldy. Eki kezeńnen turǵan birinshiliktiń alǵashqysynda tek bir ǵana kezdesýde teń oınap, qalǵan bárinde jeńiske jetken Ilıa Melanıch shákirtteri sózsiz - sol maýsymnyń favorıti edi. Sondaı-aq, taǵy bir debıýtant «Shkolnık» fýtbolshylary da jer tarpyp turǵan. Biraq tájirıbeniń jóni bir bólek qoı. Ekinshi kezeńde burynnan qalyptasyp qalǵan komandalar - «Astana-1964» pen «Dostarǵa» qarsylas shaq kelmedi. Ásirese sońǵylarynyń qarqyny qatty edi. Tek sońǵy týrda ózara kezdesýde ǵana chempıonnyń taǵdyry sheshilip, Dıdar Sydyqbek, Qýanysh Ábdýalıev, Erbol Izekenov bastaǵan, ońtústiktiń metsenaty Danııar Abdýalıev qostaǵan «Astana-1964» fýtbolshylary chempıon atandy.

Qysqy maýsymnyń úzdikteri: Úzdik qaqpashy - Serik Elýbaev (Zenıt) Úzdik qorǵaýshy - Ánýar Tókenov (Shkolnık)

Úzdik jartylaı qorǵaýshy - Týhan Hamhoev (Dostar)

Úzdik shabýylshy - Erbol Izekenov (Astana-1964)

Úzdik jattyqtyrýshy - Ádil Shanabaev (Dostar) 

«Zenıt» qalaı chempıon atandy?

Jazǵy maýsym jaıly áńgime kóp júrdi. Birde 12 komanda qatysatyn bolyp, birde olardyń sany 16-ǵa deıin kóteriletin bolyp, áıteýir naqty sanyn uzaq kúttik. Aqyry mamyrdyń 7-si kúni «Astana-Arenada» alǵashqy oıyndar ótti. 14 komandanyń qatysýymen. Ókinishke qaraı, solardyń qatarynda qysqy maýsymnyń chempıony «Astana-1964» bolǵan joq. Ol jaqtan jaýap uzaq kútken uıymdastyrýshylar komandany birinshilikte saqtap qalý úshin qoldarynan kelgenniń bárin jasady. Alaıda, qarjy tapshylyǵy óz degenin jasady. Esesine, Soltústik Qazaqstan oblysynyń «Rýzaevka» komandasynyń qosylýy birinshilikke ózinshe ár bergen edi. Al «Tselınograd» komandasynda afrıkalyq legıonerlerdiń oınaýy tipten tańsyq qubylys boldy. Biraq, kópshilik bul jańalyqty da jaqsy qabyldady. Oıyndardyń basym bóligi «Astana-Arenada» ótkenimen keı matchtar Qajymuqan atyndaǵy Ortalyq stadıonda, keıbiri Mıchýrıno kentindegi «Astana» sport kesheniniń alańynda uıymdastyryldy.

Arada úsh-tórt týr ótken soń-aq alǵashqy «baqytsyzdar» anyqtala bastady. Uıymdastyrý komıtetiniń sheshimimen «Telekom» komandasy birinshilikten shyǵaryldy. Taǵy bes alty týrdan keıin, ıaǵnı birinshilik bel ortasyna taqaǵanda «Tselınnık» ardagerleri de birinshilikten alastatyldy. Olardyń jaǵdaıy tipten qyzyq. «Rýzaevkamen» oınap jatqan. Bas tóreshi Ǵalymjan Kenjalınov bolatyn. Ardagerler 0:2 esebimen utylyp jatty. Júıkeleri de juqaryp barady. Kenet bir oıynshysy óte dóreki oınap, oıyn erejesin buzdy da, qyzyl qaǵaz aldy. Alaıda, alańdy tastap ketkisi kelgen joq. Basqa amaly qalmaǵan bas tóreshige oıyndy toqtatýǵa týra keldi. Artynsha Tártiptik-baqylaý komıteti «Tselınnıkti» aýyr jazalady.

Al chempıondyq ataq «Zenıtke» buıyrdy. Qysqy maýsymdaǵy sátsizdikterden sabaq alǵan Ilıa Melanıch quramyn birqatar myqtylarmen kúsheıtti. Buǵan deıin «Astana-1964» komandasynyń namysyn qorǵaǵan Asan Barlybaevty birden óz quramdaryna aldyrtty. Transferlik kezeńde «Zenıt» quramyn «Shkolnıkke» «renjip ketken» Ánýar Tókenov pen Aleksandr Bogomolov kúsheıtti. Ózderiniń de jigitteri qara jaıaý emes edi. Aqyry chempıonattyń aıaqtalýyna úsh týr qalǵanda «Zenıt» chempıondyq ataqty resmı túrde rásimdedi.

Úzdik qaqpashy - Beıbitjan Mamyraıymov (Shkolnık)

Úzdik qorǵaýshy - Danııar Plotnıkov (Zenıt)

Úzdik jartylaı qorǵaýshy - Roman Goncharev (Dostar)

Úzdik shabýylshy - Vıldam Nasıbýllın (Art Prınt)

Úzdik surmergen - Týhan Hamhoev (Dostar)

Úzdik jattyqtyrýshy - Ilıa Melanıch (Zenıt)

Úzdik tóreshi - Sergeı Popov (Astana) 

Kelesi chempıon kim bolar eken?

Jeltoqsannyń 10-y kúni elorda birinshiliginiń kezekti qysqy maýsymy bastaldy. Barlyǵy 16 komanda synǵa túsip jatqan bul birinshilik kelesi jyldyń naýryzyna deıin sozylmaq. «Jeńis», «Jebe», «KazAeroNavıgatsııa», «Vıktorııa» syndy debıýtanttar da bar. Al kósh basynda alǵashqy eki týrdan keıin upaı joǵaltpaǵan bes komanda tur. Olar: «Shkolnık», «Zenıt», «№8 BJMORS», «Dostar» jáne «Astana-2000». Kelesi týr 2017 jyldyń basynda bastalady. Bastan-aıaq «Astana-Arenada» ótip jatqan bul básekede kimniń baǵy janar eken?

Astana birinshiliginiń 2016/2017 jylǵy qysqy maýsymynyń týrnır kestesi myna siltemede.

Derekkóz: Astana fýtbol federatsııasy