Jyl qorytyndysy boıynsha respýblıkalyq bıýdjet kiristeri asyra oryndalady
Bul týraly búgin Úkimet otyrysynda QR Qarjy mınıstri Baqyt Sultanov málim etti, dep habarlaıdy QazAqparat.
«Ulttyq ekonomıka mınıstri baıandaǵan salalar damýynyń oń nátıjeleri memlekettik bıýdjettiń kiris bóliginiń atqarylýynda eleýli kórinis tapty. Aǵymdaǵy jospardy oryndaý jaǵynan da, sol sııaqty ótken jyldyń tıisti kezeńimen salystyrǵandaǵy ósý qarqyny jaǵynan da oń serpin baıqaldy. Máselen, memlekettik bıýdjettiń kiristeri (transfertterdi esepke almaǵanda) ótken jylmen salystyrǵanda 367 mlrd teńgege nemese 108,9 paıyzǵa ulǵaıdy. Onyń ishinde 105,9 paıyz ósý qarqynymen 172,2 mlrd teńgesi respýblıkalyq bıýdjet boıynsha, al 195,2 mlrd teńge nemese 115,8 paıyz jergilikti bıýdjetter boıynsha»,-dedi mınıstr aǵymdaǵy jyldyń 8 aıyndaǵy bıýdjettiń atqarylýy boıynsha baıandamasynda.
Onyń sózine qaraǵanda, bıyldyń 8 aıynda shyǵystardyń jyldyq kóleminen memlekettik bıýdjet boıynsha 69 paıyzy ıgerildi. Bul ótken jyldyń osyǵan sáıkes kezeńimen salystyrǵanda 7 paıyzdyq tarmaqqa joǵary.
Belgili bolǵandaı, qańtar-tamyzda memlekettik bıýdjetke (transferttersiz) bıýdjetke 4 trln 512 mlrd teńge kiris qamtamasyz etilip, asyra oryndaý 194,5 mlrd teńgeni qurady nemese esepti kezeńdegi josparǵa 104,5 paıyzdy qamtydy. Respýblıkalyq bıýdjet boıynsha aǵymdaǵy jospar 102,2 paıyzǵa oryndalyp, 3 trln 83 mlrd teńge jınaldy. Asyra oryndaý 67,4 mlrd teńgeni qurady.
«Jalpy, barlyq túsimder turǵysynda ótken jylmen salystyrǵanda eleýli ósim baıqalýda. Ósimniń aǵymdaǵy qarqyny bazasynda qazirgi ekonomıkalyq ahýal saqtalǵan jaǵdaıda 2017 jyldyń qorytyndysy boıynsha respýblıkalyq bıýdjet kiristeriniń asyra oryndalýy 115 mlrd teńge somasynda boljanyp otyr»,-dedi Baqyt Sultanov.