Jyl qorytyndysy boıynsha ınflıatsııa qaı deńgeıde bolýy múmkin

NUR-SULTAN. QazAqparat – Jyldyq mánde ınflıatsııa mamyrda 14 paıyzǵa jetti. Bul týraly elordadaǵy baspasóz máslıhatynda QR Ulttyq bankiniń tóraǵasy Ǵalymjan Pirmatov málim etti, dep habarlaıdy QazAqparat tilshisi.

«Osy jyldyń qorytyndysy boıynsha ınflıatsııany 13-15 paıyz deńgeıinde boljap otyrmyz. Syrtqy jáne ishki azyq-túlik naryqtaryndaǵy baǵa dınamıkasyn eskere otyryp, tamaq ónimderi boıynsha baǵalar ósýi múmkin.

Bul boljam Úkimettiń ınflıatsııa deńgeıin baqylaý jáne tómendetý jónindegi is-sharalar keshenin iske asyrýdy eskere otyryp jasaldy. Osy qadamdar tutyný naryqtarynyń teńgerimdi damýyn qamtyp otyr. Osy is-sharalar kesheni tabysty iske asyrylǵan kezde ınflıatsııa boljamnyń tómengi shegine deıin túsýi múmkin», - dedi Ǵ. Pirmatov elordada ótken baspasóz máslıhatynda.

Onyń aıtýynsha, azyq-túlikke jatpaıtyn taýarlar baǵasynyń ósýi birshama jedeldeýi múmkin. Aqyly qyzmetterdiń ınflıatsııasy 2021 jyldyń joǵary bazasyna baılanysty báseńdeıdi.

«Retteletin kommýnaldyq qyzmetter baǵasynyń olardy kóterýge moratorıı aıaqtalǵannan keıin qymbattaýy táýekelderi bolýy yqtımal. Sondaı-aq joǵary ınflıatsııalyq táýekelder aıasynda naryqta kórsetiletin qyzmetter baǵasynyń ósýin atap ótemiz», - dedi UB basshysy.

Budan buryn habarlanǵandaı, Ulttyq bank tóraǵasy bazalyq mólsherlemeni 14 paıyz deńgeıinde saqtaýǵa qatysty pikir bildirdi.

Jyldyq mánde ınflıatsııa mamyrda 14 paıyzǵa jetti.