Jyl basynynan beri tótenshe jaǵdaılar salasynyń qyzmetkerleri 400 adam men 175 tehnıkany qutqardy

Bul týraly búgin jýrnalıstermen bolǵan brıfıngte Tótenshe jaǵdaılar mınıstrliginiń baspasóz qyzmeti basqarmasynyń aǵa ınjeneri Lıýbov Shaposhnıkova málim etti, dep habarlaıdy QazAqparat.

Onyń málimetterine qaraǵanda, jyl basynan beri respýblıka joldarynda adamdardyń qaýipsizdigin qamtamasyz etý maqsatynda birneshe márte kólik qozǵalysy toqtatylǵan. Sondaı-aq Shyǵys Qazaqstan, Qaraǵandy, Pavlodar, Almaty oblystary men Astana qalasynyń aımaǵyndaǵy joldar jabylyp, azamattar men kólikterdi qutqarý sharalary da birneshe ret júzege asyrylǵan. «Qańtardyń 14-i kúni Shyǵys Qazaqstan oblysynyń Tótenshe jaǵdaılar jónindegi departamentiniń ókilderi «Óskemen-Qalbataý-Aıagóz» baǵytyndaǵy jolda qar qursaýynan jolaýshylary bar 60 kólikti alyp shyqty. Olardyń arasynda 3 jolaýshylar avtobýsy bar. Al qańtardyń 18-i kúni Almaty oblysynyń Raıymbek aýdanynda «Almaty-Kegen-Narynqol» baǵytyndaǵy joldaǵy qarda 19 adam men 7 tehnıka qaldy. Apatty -qutqarý sharalarynyń barysynda olardyń barlyǵy aman qaldy», dedi basqarma ınjeneri.

Sondaı-aq onyń málimetterine qaraǵanda, qańtardyń 19-y kúni Qaraǵandy oblystyq tótenshe jaǵdaılar departamentiniń «Sátbaev-Qaraǵandy» baǵytynda bara jatqan jolaýshylar avtobýsynyń dızel otynynyń qatyp qalýyna baılanysty «Qyzylorda - Pavlodar» tas jolynyń boıynda turyp qalǵandyǵy jóninde habar kelip túsken. Kólikte 40 jolaýshy bolǵan. Qutqarý sharalarynyń barysynda 20 jolaýshy ózge avtobýsqa otyrǵyzylyp, basqalary jaqyn mańaıdaǵy aýylǵa jetkizilgen. Sóıtip jolaýshylardyń barlyǵy din aman qaldy.