Jyl basynan poıyz bıletiniń quny 7%-ǵa qymbattaǵan

ASTANA. QazAqparat – BAQ ókilderiniń saýalyna jaýap bergen «Qazaqstan temir joly» UQ basqarma tóraǵasynyń orynbasary Qanat Álmaǵambetov «Talgo» poıyzdarynyń bılet quny nege qymbat ekenin túsindirdi, dep habarlaıdy QazAqparat tilshisi.

«Talgo vagondary qarapaıym poıyzdarǵa qaraǵanda jaıly. «Talgoǵa» eki dızeldi vagon qyzmet kórsetedi. Olar búkil quramdy sýmen, jaryqpen jáne jylýmen qamtamasyz etedi. Ol úshin oǵan 2 tonnaǵa deıin dızel otyny satyp alynady. Biz ár reısti jabdyqtaımyz. Qymbatshylyqtyń sebebi - dızel otynynyń qymbattyǵy men «Talgo» kompanııasynyń vagondaryna kórsetiletin servıstik qyzmetke baılanysty. Kompanııanyń óz fılıaly bar jáne olar osy vagondarǵa qyzmet kórsetedi. Biz «Talgo» vagondaryna eski poıyzdar sııaqty aǵytyp, kúrdeli jóndeý jasamaımyz», - dedi Qanat Álmaǵambetov Indýstrııa mınıstrliginiń keńeıtilgen alqa otyrysynan keıin.

Basqarma tóraǵasy orynbasarynyń aıtýynsha, poıyz bıletteriniń qymbattyǵy vagondarǵa qyzmet kórsetý men olardy kútip ustaýǵa jumsalatyn shyǵyndarǵa baılanysty. Sondaı-aq, ol jyl saıyn baǵa kóterilip otyratynyn atap ótti.

«Jeke tasymaldaýshylar da, «Jolaýshylar tasymaly» da 1 qańtardan bastap bılet qunyn 7%-ǵa kóterdi», - dedi Qanat Álmaǵambetov.

Eske salaıyq, buǵan deıin Senat depýtattarynyń saýalyna Premer-Mınıstr Álıhan Smaıylov elimizdegi kommertsııalyq poıyzdar bıleti qymbat bolǵanymen, shyǵyndy ekenin málimdep edi.