Jyl basynan órt saldarynan elimizdiń orman qoryna 6 mln. teńge shyǵyn keldi
ASTANA. QazAqparat - Aǵymdaǵy jyldyń 7 aıynyń ishinde órt saldarynan elimizdiń orman qoryna 6,1 mln. teńge shyǵyn keldi. Bul týraly búgin brıfıngte QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«2015 jyldyń ótken kezeńinde memlekettik orman qorynyń aýmaǵynda bolǵan órt 2014 jyldyń sáıkes kezeńine qaraǵanda 47 paıyzǵa az. Materıaldyq shyǵyn 3,4 ese tómendedi. 2015 jyly orman órtteriniń basym bóligi Shyǵys Qazaqstan (67 oqıǵa) jáne Pavlodar (50 oqıǵa) oblystarynda boldy», - dedi ol. Resmı ókildiń atap ótýinshe, 2015 jylǵy 7 aıda 43 dala órti tirkelip, órt jaıylǵan alań 36 684 gektardy quraǵan. 2014 jylmen salystyrǵanda dala órtteri 11 paıyzǵa óskenimen, qyzyl jalyn sharpyǵan aımaq 1,5 ese azaıǵan. «Jalpy tabıǵı órttermen kúresý úshin respýblıkadaǵy memlekettik órtke qarsy qyzmet organdarynyń ıeliginde 1550 negizgi órt sóndirý tehnıkasy, onyń ishinde syıymdylyǵy 5 tekshe metrden asatyn 390 órt sóndirý avtotsısternasy, sý sorý ónimdiligi sekýndyna 110-nan 200 lıtrge deıin 44 órt-sorǵy stansasy, syıymdylyǵy 30 tekshe metrlik eki órt sóndirý avtopoıyzy bar», - dedi ol.
