Jyl basynan óndiriste 69 jumysshy qaza tapty – Eńbek mınıstrligi

ASTANA. QazAqparat – Bıylǵy alty aıda óndiriste 640 jumysker zardap shegip, onyń 69-y qaza tapty. QazAqparat bul týraly Eńbek jáne halyqty áleýmettik qorǵaý mınıstrligine silteme jasap habarlaıdy.

Bul rette óndiriste jaraqat alý 2022 jyldyń ekinshi jartyjyldyǵymen salystyrǵanda 4% tómendegen.

Respýblıkanyń ónidiristik aımaqtarynda jaraqat alýdyń eń joǵary deńgeıi saqtalyp otyr. Máselen, Qaraǵandy oblysynda – 79 adam, ShQO-da – 53 adam, Abaı oblysynda – 50 adam, Pavlodar oblysynda – 46 adam, Qostanaı oblysynda – 44 adam, Aqtóbe oblysynda – 40 adam zardap shekken. Sondaı-aq Almaty qalasynda 50 jumysshy jaraqat aldy.

Taý-ken metallýrgııa kesheniniń kásiporyndarynda jumysshylar eń kóp zardap shegedi – 21,8 %, ekinshi orynda qurylys salasy – 10,6%.

Jazataıym oqıǵalardyń oryn alýynyń negizgi sebepteri: jumysshynyń abaısyzdyǵy (33,3%); óndiristegi jumystyń tıisti deńgeıde uıymdastyrylmaýy (27,1%); eńbek qaýipsizdigi jáne eńbekti qorǵaý erejelerin buzý (9,3%); jol qozǵalysy erejelerin buzý (8,4%).

Sońǵy bes jylda qabyldanǵan keshendi sharalardyń nátıjesinde óndiriste jaraqat alý 6,5% tómendegen.