Jyl basynan memorgandarǵa 95,4 mln kıbershabýyl, 3000 DDoS-shabýyl jasaldy - UQK
Tóraǵanyń aıtýynsha, eldegi aqparattyq qaýipsizdikti qamtamasyz etý – Ulttyq qaýipsizdik komıteti jumysynyń basym baǵyttarynyń biri.
«Erkin aınalymdaǵy aqparattyń el qaýipsizdigine, onyń saıası, ekonomıkalyq, qorǵanys jáne basqa da salalaryna yqpalynyń artýyna baılanysty bul baǵyttaǵy jumystar ýaqyt ótken saıyn ózekti bola tústi. Avtomattandyrý úderisteriniń qarqyndy damýy, aqparattyq tehnologııalardyń qazirgi ómirdiń barlyq salasyna enýi resýrstar men derekterge ruqsatsyz qol jetkizýdiń jańa múmkindikterin ashyp otyr. Ásirese, hakerler memlekettik organdardyń aqparattyq resýrstaryna erekshe «qyzyǵýshylyq» tanytady. Tek osy jyldyń basynan beri qaraı 95,4 mıllıonnan astam kıbershabýyl men 3000 DDoS-shabýyldyń beti qaıtarylǵanyn aıtsam jetkilikti shyǵar. Olar ınternet jelisiniń otandyq segmentindegi qorǵalǵan memlekettik jáne ózge de resýrstarǵa zańsyz qol suǵýdy kózdegen bolatyn», - deıdi suhbat barysynda Ermek Saǵymbaev.
Onyń sózinshe, UQK men basqa da memlekettik organdar iske asyrǵan «Qazaqstannyń kıberqalqany» baǵdarlamasy eldiń aqparattyq keńistigin keshendi qorǵaýǵa baǵyttalǵan. Ol uıymdastyrýshylyq jáne tehnıkalyq sharalarmen qamtamasyz etilgen.
«Táýlik boıy Aqparattyq qaýipsizdiktiń ulttyq úılestirý ortalyǵy qaýip-qaterlerdi anyqtaıdy jáne tıisinshe áreket etedi. Sonymen qatar ınternet jelisinde ataqty adamdar men sheneýnikter atynan jasalǵan «úndeýleri» bar jalǵan beıneler taraǵan kezde «Deep Fake» tehnologııasy kómegin tıgizip jatyr», - deıdi UQK tóraǵasy.
Aıta ketsek, búgin – Ulttyq qaýipsizdik komıteti kúni. 1992 jyldyń 13 shildesinde el Prezıdentiniń Jarlyǵymen Qazaqstan Respýblıkasynyń Ulttyq qaýipsizdik komıteti quryldy.
