Jyl basynan memlekettik qyzmetshiler 1 mlrd teńgege jýyq para alǵan
ASTANA. QazAqparat - Aǵymdaǵy jyldyń basynan beri memlekettik qyzmetshiler 1 mlrd. teńgege jýyq para alǵan. Bul týraly búgin Úkimet úıinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaımova aıtty, dep habarlaıdy QazAqparat.
«Aǵymdaǵy jyldyń basynan beri para alǵany úshin 900-den astam adam ustaldy. Olardyń alǵan paralarynyń kólemi ártúrli bolyp keledi. Biraq, 1 mıllıon teńgeden kem emes. Degenmen, sońǵy jyldary para alyp isti bolǵan memlekettik qyzmetshilerdiń qatary kemı túsýde», - dedi Aıgúl Shaımova.
Sonymen qatar brıfıng barysynda BAQ ókilderi áleýmettik jelide pikir jazǵan memlekettik qyzmetshi jazalanady degen aqparattyń qanshalyqty shyndyqqa janasatyndyǵyn suraǵan bolatyn.
«Meniń oıymsha, bul jalǵan málimet. «Memlekettik qyzmet týraly» zań aıasynda da, Memlekettik qyzmetshilerdiń Ádep kodeksinde de mundaı jaýapkershilik qarastyrylmaǵan», - dedi ol.
Osy rette jýrnalıster ShQO memlekettik qyzmet isteri jáne jemqorlyqqa qarsy is-qımyl departamenti basshysynyń mindetin atqarýshy Janna Qabdollaqyzynyń ádep jónindegi keńes otyrysynda áleýmettik jelidegi paraqshasynda ádepke jatpaıtyn fotolar men pikirler qaldyrǵany úshin 30-dan astam memlekettik qyzmetshiniń jaýapqa tartylǵandyǵyn aıtqanyn mysalǵa keltirdi.
«Pikir jazǵany úshin eshkim jazalamaıdy. Bul málimetti tekseretin bolamyz. Jalpy memlekettik qyzmetshiniń áleýmettik jelide ózin qalaı ustaý kerektigi Ádep kodeksinde kórsetilgen», - dedi agenttik tóraǵasynyń orynbasary.
