Jyl basynan memleket bıýdjetine 8 trln teńge túsken

ASTANA. QazAqparat – Jyl basynan respýblıkalyq bıýdjet túsimi azaıyp, jergilikti bıýdjet kiristeri artqan. Bul týraly Qarjy mınıstri Erulan Jamaýbaev búgin Úkimet otyrysynda baıandady, dep habarlaıdy QazAqparat tilshisi.

«Memleket bıýdjetine 8 trln teńgeden asa kiris tústi nemese jospar 103,0% oryndaldy. Al respýblıkalyq bıýdjetke 5,4 trln teńge tústi. Jospar 93,8% oryndaldy. Atqarylmaǵan bóligi 355 mlrd teńgeni qurady», - dedi E. Jamaýbaev.

Oǵan qosa, salyqtar boıynsha jospardyń 400 mlrd teńgege oryndalmaýyna korporatıvtik tabys salyǵy, shıki munaıǵa eksporttyq keden bajy jáne paıdaly qazbalardy óndirýge salynatyn salyq áser etken.

«Korporatıvtik tabys salyǵy boıynsha jospardyń oryndalmaýy bıylǵy 5 aıda 641 iri salyq tóleýshi boıynsha málimdelgen avanstyq tólemder somasynyń ótken jyldyń uqsas kezeńinen 34% nemese 108 mlrd teńgege azaıýymen baılanysty. Shıki munaıǵa eksporttyq keden bajy boıynsha jospardyń oryndalmaýy naqty qalyptasqan mólsherlemesiniń boljamdy kórsetkishten 13% tómendeýimen baılanysty boldy. Paıdaly qazbalardy óndirýge salynatyn salyq boıynsha jospardyń oryndalmaýyna negizgi eksporttyq taýarlar baǵasynyń orta eseppen 11% tómendeýi áser etti», - dep túsindirdi Qarjy mınıstri.

Mınıstrdiń aıtýynsha, jergilikti bıýdjetterdiń kiristeri 128,9% atqaryldy jáne 2,6 trln teńgeni qurady. Mundaǵy jospar 590 mlrd teńgege, onyń ishinde salyqtar boıynsha 548 mlrd teńgege asyra oryndaldy. Kirister boıynsha josparlar Almaty oblysynan basqa barlyq óńirlerde asyra oryndalǵan.