Jyl basynan medıtsınalyq saqtandyrý qory medıtsına uıymdaryna 497,5 mlrd teńge tóledi
ASTANA. QazAqparat - «Áleýmettik medıtsınalyq saqtandyrý qory» AQ jyl basynan beri Qazaqstandaǵy medıtsına uıymdaryna 497,5 mlrd teńge kóleminde qarjy bóldi. Bul týraly Medıtsınalyq saqtandyrý qory basqarma tóraǵasynyń mindetin atqarýshy Botagóz Jaqselekova málim etti, dep habarlaıdy QazAqparat.
Basqarma basshysynyń aıtýynsha, atalǵan qarjy kepildendirilgen kómek sheńberinde halyqqa tegin qyzmet kórsetken emdeý mekemelerine 6 qyrkúıekke deıin aýdarylǵan.
«Bul - kepildendirilgen tegin medıtsınalyq kómek sheńberinde bekitilgen kelisimsharttardyń jalpy somasynyń 65 paıyzy», - dedi Botagóz Jaqselekova.
Kepildendirilgen tegin medıtsınalyq kómek jáne medıtsınalyq saqtandyrý paketteriniń qarjylyq operatory bolyp sanalatyn Qor emdeý mekemeleri halyqqa tegin kómek kórsetý jóninde kelisimsharttar bekitken. Bekitilgen kelisimsharttardyń jalpy somasy 768,4 mlrd teńge.
«Jumys kestege saı medıtsınalyq qyzmet sapasyn baqylaýdyń jańa talaptaryna sáıkes júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - dedi B.Jaqselekova.
Esterińizge sala ketsek, búgingi tańda Qor memlekettik tapsyrys boıynsha qyzmet kórsetýge nıet bildirgen 1365 medıtsına uıymymen kelisimshart bekitken. Onyń 623-i - jekemenshik klınıkalar. Bıyl jeke klınıkalar sany 2017 jylmen salystyrǵanda 158-ge kóbeıgen. Al, olarmen bekitilgen kelisimshart somasy ótken jylǵydan 2 ese artyp, 110,6 mlrd teńgeni qurady.
