Jyl basynan lańkestik týraly jalǵan habar bergen 7 adam sottaldy - Joǵarǵy Sot
ASTANA. 2 tamyz. QazAqparat - Lańkestik akti týraly kórineý jalǵan habar berip,eldi dúrliktirgeni úshin jaýapkershiliktiń qataıtylǵanyna qaramastan, bundaı qylmys qatary tolastamaı otyr.
Máselen, aǵymdaǵy jyldyń basynan beri dál osy bappen 7 adam sottaldy. Bul týraly búgin QR Joǵarǵy Sotynyń aǵymdaǵy jyldyń birinshi jartyjyldyǵyn qorytyndylaýǵa arnalǵan brıfıng barysynda resmı ókil Oksana Peters málim etti.
«Terrorıstik akti týraly kórineý jalǵan habar berý qylmystyq jaýapkershilikke ákep soǵady. Bul boıynsha sanktsııa berý tártibi qataıtylyp, ondaı qylmys úshin 200-den 500 aılyq eseptik kórsetkishke deıin aıyppul tóleý nemese 7 jyl merzimge deıin bas bostandyǵyn shekteý nemese 6 jylǵa deıin bas bostandyǵynan aıyrý jazasy taǵaıyndalady. Al bundaı qylmysty jasaǵan tulǵa 14 jasqa tolǵan bolsa ǵana jaýapkershilikke tartylady. Degenmen, terrorıstik akti týraly jalǵan aqparat berip, jasy jetpegeni úshin qylmystyq jaýapkershilikten qutylǵanymen, balalardyń bul qylyǵy úshin onyń ata-anasy nemese zańdy ókili materıaldyq jaýapkershilikten qashyp qutyla almaıdy», - deıdi O. Peters.
Onyń aıtýynsha, aǵymdaǵy jyldyń birinshi jartyjyldyǵynda respýblıka sottary jalǵan lańkestik aqpar bergen 7 adamdy sottap, «jalǵan qońyraýdan» memleketke kelgen 894 myń 116 teńge kóleminde shyǵyn óndirilgen.
