Jyl basynan qyzylordalyq 10 kásipker «BJK - 2020» boıynsha qoldaý tapty

QYZYLORDA. QazAqparat-Jyl basynan Qyzylorda oblysynda 10 kásipkerdiń jobasy «Bıznestiń jol kartasy - 2020» bıznesti qoldaý men damytýdyń biryńǵaı baǵdarlamasy aıasynda keshendi qoldaý tapty, dep habarlady QazAqparat tilshisi.

Metallýrgııa ónerkásibi, kıim jáne tamaq ónimderin óndirý salalarynda qyzmet kórsetetin kásiporyndar ekinshi deńgeıli bankterden nesıe alyp,onyń paıyzdyq ústemesin 7-den 10 paıyzǵa deıin tómendetýge múmkindik aldy.

Kásipkerlerdiń 70%-y kepilzat jetispeýshiliginen týyndaǵan máselesin jartylaı kepildendirý quralynyń kómegimen sheship otyr. Ekinshi deńgeıli bankterden qarajat tartýǵa qajetti kepildemeni kásipkerlerge «Damý» qory usyndy.

Jeke kásipker Jandos Járkeev «Damý» qorynyń sýbsıdııa jáne jartylaı kepildendirý sekildi qarjy quraldarynyń kómegimen óz bıznesin damytýǵa qol jetkizdi. Kóp jyldan beri tıpografııalyq jáne polıgrafııalyq ónim óndirý salasynda bıznesin dóńgeletip otyrǵan kásipkerdiń basty maqsaty, jalǵa alynǵan ǵımaratta ornalasqan tsehyn keńeıtý bolǵan. Memleket qoldaýy nátıjesinde «ForteBank» AQ-nan rásimdegen nesıege jeke kásipker Jandos Járkeev arnaıy jabdyqtalǵan ǵımarat alyp,óz bıznesin ulǵaıtýǵa múmkindik aldy.

Qarmaqshy aýdanynyń kásipkeri Bahytkúl Bekseıtova «Damý» qorynyń 50% kepildemesimen «Sberbank» AQ EB-den 20 mln. teńge kóleminde nesıe rásimdep, aınalym qarajatyn tolyqtyrdy. «Bıznestiń jol kartasy - 2020» baǵdarlamasy aıasynda jeke kásipkerdiń nesıesi memleket tarapynan sýbsıdııalanyp otyr. Nátıjesinde nesıeniń paıyzdyq ústemesi 5 %-ǵa deıin tómendetildi. Bahytkúl Bekseıtovanyń aıtýynsha, memleket tarapynan kórsetilgen qoldaý arqasynda ol kásibin damytyp, keńeıtýge sheksiz múmkindik alyp otyr.