Jyl basynan Qazaqstan joldarynda 1200-den astam adam kóz jumdy
ASTANA. QazAqparat - Quqyqtyq statıstıka jáne arnaıy esepke alý jónindegi komıtetiniń statıstıkalyq derekterine qaraǵanda, bıylǵy 7 aıda 9 941 jol-kólik oqıǵasy tirkelip, onyń saldarynan 14 myń adam zardap shekti. Olardyń arasynda 1228 adam qaza bolyp, qalǵandary túrli deńgeıde jaraqat aldy.
Statıstıkalyq kórsetkishterge qaraǵanda, jol apattarynyń sebepteri ózgermeı tur. Jalpy, 90 paıyzdan artyq JKO Jol qozǵalysy erejelerin buzatyn júrgizýshilerdiń kinásinen bolady. Sonymen, olardyń kinásinen 9490 apat jasalǵan, onyń ishinde 337-si alkogoldik jáne esirtkilik mas kúıinde bolǵan júrgizýshilerdiń kinásinen oryn alǵan.
Bıylǵy jyly qoǵamdyq kóliktiń qatysýymen 645 JKO oryn alyp, onda 48 adam qaza boldy, 896-sy jaraqattandy.
Aıta keteıik, «Memlekettik quqyqtyq statıstıka jáne arnaıy esepke alý týraly» Qazaqstan Respýblıkasynyń Zańyna sáıkes, Quqyqtyq statıstıka jáne arnaıy esepke alý jónindegi komıtet adamdardyń ólimine nemese jaraqattanýyna alyp kelgen jol-kólik oqıǵalaryn ǵana esepke alady.
