Jyl basynan Qazaqstan shekarasynda 1 tonnaǵa jýyq esirtki tárkilendi

ASTANA. QazAqparat – Jyl basynan shekarada 940 keliden astam aýyr esirtki zattary tárkilendi. Bul týraly Ulttyq qaýipsizdik komıteti Shekara qyzmetiniń bıylǵy birinshi jartyjyldyqtaǵy qyzmettiniń qorytyndysyna arnalǵan brıfıngide Shekaralyq baqylaý departamenti bastyǵynyń birinshi orynbasary Ǵanı Aǵadilov aıtty, dep habarlaıdy QazAqparat tilshisi.

Shekara qyzmeti halyqaralyq qatynastar joldarynda esirtkiniń zańsyz aınalymynyń jolyn kesý boıynsha belsendi jumystardy iske asyryp jatyr. Bıyl «geroın», «kanabıs», «aýǵan charsy» dep atalatyn 940 keliden astam aýyr esirtki zattaryn shekaradan ótkizý qylmysynyń joly kesildi. Sonymen qatar Túrkistan, Jambyl jáne Soltústik Qazaqstan oblystarynyń ótkizý pýnkterinde asa iri kólemde esirtki zattary tárkilendi. Esirtki kontrabandasynyń barlyq faktileri boıynsha qylmystyq is qozǵaldy

, - dedi Ǵ. Aǵadilov Ortalyq kommýnıkatsııalar qyzmetinde.

Sonymen qatar spıker áýejaılarda pasporttyq baqylaýdyń bıometrııasy negizinde avtomatty túrde ótýdiń jańa tehnologııalaryn engizý jumystary atqarylyp jatqanyn aıtty.

«Máselen, Astana qalasynyń áýejaıynda testilik rejımde otandyq óndiristiń «Q-gate» pasporttyq baqylaýdyń avtomattandyrylǵan júıesi synaqtan ótip jatyr. Bul baqylaý túrin engizýge onyń ekonomıkalyq tıimdiligi, pasporttyq baqylaýdy júrgizýdiń qaýipsizdigi, jyldamdyǵy jáne yńǵaıly bolýy yqpal etti. Bolashaqta shekaradaǵy qarqyndy ótkizý pýnkterin jáne Qazaqstan Respýblıkasynyń iri halyqaralyq áýejaılarynda osy júıeni qosý josparlanyp otyr», - dedi Shekaralyq baqylaý departamenti bastyǵynyń birinshi orynbasary.

Budan buryn habarlanǵandaı, bıyl 7 aıda Qazaqstan shekarasynan 20,5 mln adam ótken.