Jyl basynan elimizdiń sý aıdyndarynda 28 adam mert boldy
NUR-SULTAN. QazAqparat - Sýǵa shomylý maýsymy áli bastalmasa da elimizdiń sý aıdyndarynda 28 adam, onyń ishinde 10 bala mert boldy. Bul jaıynda QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
«Bıyl sýǵa shomylý maýsymy áli bastalmaǵanyna qaramastan 29 sáýirdegi jaǵdaı boıynsha elimizdiń sý aıdyndarynda 28 adam, onyń ishinde 10 bala kóz jumdy. Jyl basynan beri respýblıka boıynsha 18 balyqshy sýǵa batty. Onyń 5-ýi muz astyna túsip ketti. Adamdardyń qaza bolýynyń negizgi sebepteri - balyq aýlaý kezinde qaýipsizdik erejelerin buzý. Balyq aýlaý kezinde qaýipsizdik erejelerin saqtamaý osyndaı qaıǵyly saldarǵa ákep soǵady», - dedi komıtetten.
Máselen, 29 sáýirde ShQO TJD jedel-qutqarý jasaǵynyń mamandary men Rıdder qalasy 1-MÓSB qyzmetkerleri ózenge batyp ketken 2002 jyly týǵan jigitti tapty. Іzdeý jumystary 24 sáýirden beri júrgizilgen. Al Shyǵys Qazaqstan oblysy Úrjar aýdany Kóktal aýylyndaǵy Úrjar ózeninde qutqarýshylar sýǵa shomylý kezinde batyp ketken 1987 jyly týǵan adamnyń múrdesin áli izdep jatyr.
«Tótenshe jaǵdaılar komıteti elimizdiń ońtústik jáne batys óńirlerinde jyly aýa raıynyń bastalýyn, karantın rejıminiń jeńildetilýin eskere otyryp, azamattardy sý aıdyndarynda bolǵan kezde qaýipsizdik erejelerin qatań saqtaýǵa shaqyrady»,- delingen taratylǵan aqparatta.
