Jyl basynan elimizde 38 mektep paıdalanýǵa berildi

ASTANA. QazAqparat – Jyl basynan Qazaqstanda 31 myńnan astam nysan paıdalanýǵa berildi. Onyń ishinde turǵyn úı, densaýlyq saqtaý, bilim berý jáne ózge de nysandar bar. QazAqparat bul týraly Ulttyq statıstıka bıýrosyna silteme jasap habarlaıdy.

Jyl basynan beri Qazaqstanda jalpy aýdany 12 316,3 myń m2 bolatyn 31 myńnan astam nysan paıdalanýǵa berildi.

2022 jyldyń qańtar-qyrkúıek aılarynda qurylys jumystarynyń kólemi 3 989,9 mlrd teńgeni qurady, bul ótken jyldyń sáıkes kezeńimen salystyrǵanda 5,1% joǵary.

Respýblıka boıynsha qurylys jumystarynyń jalpy kóleminiń 83,8% - jeke qurylys uıymdary, 16,1% –sheteldik jáne 0,1% - memlekettik uıymdar oryndaǵan.

Qurylys jumystary kóleminiń eń joǵary ósimi tirkelgen óńirler:

- Shymkent qalasy – 39,7%;

- Qyzylorda oblysy – 35,1%;

- Aqmola oblysy – 26,9%;

- Almaty oblysy – 14,5%;

Qurylys jumystarynyń kólemi azaıdy:

- Qaraǵandy oblysynda – 10,7%;

- Abaı oblysynda – 23%;

- Mańǵystaý oblysynda – 34,7%

Paıdalanýǵa berilgen nysandardyń 90,8 paıyzy turǵyn úı sektoryna tıesili, bul 28 myńnan astam turǵyn úı nysany. Odan keıingi orynda magıstraldyq jáne jergilikti qubyrlar, baılanys jelileri, energetıka jelileri, qosalqy nysandar tur – 1169 nysan. Saýda nysandary úshinshi orynda, jyl basynan beri 513 obekti paıdalanýǵa berildi.

Bilim berý jáne densaýlyq saqtaý salasynda bıylǵy toǵyz aıda 38 jalpy bilim beretin mektep, 24 mektepke deıingi uıym, 3 aýrýhana, sondaı-aq 6 ambýlatorııalyq emhana iske qosyldy.