Jyl basynan el joldarynda 25 myń mas júrgizýshi ustaldy - Qasymov
ASTANA. QazAqparat - Aǵymdaǵy jyldyń basynan beri elimizdiń joldarynda 25 myń mas júrgizýshi ustaldy. Bul týraly búgin QR Parlamenti Senatynda ótip jatqan «Jol qozǵalysy salasyndaǵy quqyqtyq retteýdiń jaı-kúıi men problemalary» taqyrybyndaǵy parlamenttik tyńdaý barysynda elimizdiń Іshki ister mınıstri Qalmuhanbet Qasymov málim etti, dep habarlaıdy QazAqparat.
«25 myń mas júrgizýshi ustalyp, óreskel zań buzýshylyq jasaǵan shamamen 35 myń júrgizýshi sot sheshimimen kólik júrgizý quqyǵynan aıyryldy. 3,5 myń quqyq buzýshy ákimshilik tutqyndaýǵa ilikti», - dedi Qasymov.
Onyń derekterine qaraǵanda, osy jyldyń basynan beri shamamen 2 mıllıon jol qozǵalysy erejesin buzý áreketterine tosqaýyl qoıylǵan. Munan bólek, qaýipsizdik beldeýin taqpaý, uıaly telefondy paıdalanýmen baılanysty buzýshylyqtardy anyqtaý jumystary birshama kúsheıtilgen.
