Jyl basynan beri jetim balalar memleketten neshe páter aldy

NUR-SULTAN. QazAqparat – Premer-Mınıstrdiń orynbasary Eraly Toǵjanov anasynyń qamqorlyǵynsyz qalǵan balalardy baspanamen qamtý máselesi týraly depýtattyq saýalǵa jaýap berdi, dep habarlaıdy QazAqparat tilshisi.

«Turǵyn úı qatynastary salasyndaǵy zańnamaǵa sáıkes jetim balalar men ata-anasynyń qamqorlyǵynsyz qalǵan balalardyń memlekettik turǵyn úı qorynan turǵyn úı alýǵa birinshi kezekte quqyǵy bar», - dep jazdy Eraly Toǵjanov óz jaýabynda.

Onyń aıtýynsha, 2020 jyly kommýnaldyq turǵyn úı qorynan 847 páter, al bıyl alǵashqy úsh aıda 403 páter berilgen.

«Sizdiń saýalyńyz boıynsha Shymkent qalasynyń ákimdigi arqyly berilgen turǵyn úılerge tekserý júrgizildi. 2020 jyly Shymkent qalasy boıynsha turǵyn úımen qamtamasyz etilgen jetim balalar men ata-anasynyń qamqorlyǵynsyz qalǵan balalardyń sany 48-ge jetti», - dep jazylǵan vıtse-Premerdiń jaýabynda.

Atalmysh tekserý barysynda eki azamattyń «jetim balalar, ata-anasynyń qamqorlyǵynsyz qalǵan balalar» sanaty boıynsha páter alsa da, tizimge engizilmegeni belgili bolypty. Búgingi tańda tizim jańartylyp, tolyqtyrylǵan.