Jyl basynan beri jemqorlar qansha aqsha urlady
Agenttiktiń resmı ókili Nurlan Jaxınniń aıtýynsha, jyl basynan beri materıaldyq shyǵynnyń kólemi 7 mlrd teńgeni qurady. Byltyr atalǵan kórsetkish 2,1 mlrd teńge bolǵan. Bıyl 6,3 mlrd teńge bıýdjetke qaıtaryldy. "Sybaılas jemqorlyqqa qarsy qyzmet 477 laýazymdy tulǵanyń qylmysyn áshkereledi. Olardyń ishinde respýblıkalyq deńgeıdegi 13 basshy, oblystyq - 39, qalalyq jáne aýdandyq deńgeıdegi 71 basshy bar. 146 adam uıymdasqan qylmystyq topty quryp, áreket etken. Memlekettik baǵdarlamalarǵa bólingen bıýdjet qarjysyn maqsatsyz jumsaý faktileri de anyqtaldy. Ondaı tártip buzýshylyqtardyń basym bóligi "Nátıjeli jumyspen qamtý jáne jappaı kásipkerlikti damytý", "Óńirlerdi damytý - 2020", "Nurly jol", bilim jáne ǵylym baǵdarlamalary boıynsha tirkelgen. Jemqorlar kóp jaǵdaıda qurylys nysandarynyń jalǵan aktilerin rásimdep jatady. Sosyn bıýdjet aqshasyn taratqany úshin, sondaı-aq, jer telimderin bergeni úshin para alyp otyrady. Sóıtip, memlekettiń aqshasyn talan-tarajǵa salady", - dedi N.Jaxın Astanada ótken baspasóz máslıxatynda.
Resmı málimetke sáıkes, sońǵy bes aıdyń ishinde 1 418 qylmystyq tártip buzýshylyqtar tirkeldi. Sonyń jartysy para alýǵa qatysty bolsa, qalǵany - aqshany iri kólemde jymqyrý faktileri. "Negizi, bıýdjet qarajatyn talan-tarajǵa salý faktileri 13 protsentke artyp otyr. Sonyń ishinde iri kólemde aqsha urlaý faktileri de kóbeıdi. Osynyń ózi sybaılas jemqorlyqqa qarsy kúrestiń kúsheıgenin kórsetse kerek", - dep atap kórsetti N.Jaxın.
Aıta keteıik, búgin agenttik ókilderi paramen ustalǵan birneshe sheneýniktiń vıdeosyn jarııalady. Olardyń ishinde QR Syrtqy ister mınıstrliginiń burynǵy jaýapty xatshysy, sondaı-aq "Kedentransservıs" AQ vıtse-prezıdenti bar.
Budan bólek, Jambyl oblysynda túrme bastyǵynyń orynbasary alǵan paranyń vıdeosy kórsetildi.