Jyl basynan beri Túrkistanǵa jarty mıllıonǵa jýyq týrıst kelgen
ASTANA. QazAqparat – Jyl basynan beri Túrkistanǵa 470 myńnan astam týrıst jáne 1 mıllıonǵa jýyq vızıter kelgen. Aımaq basshysy Darhan Satybaldy ortalyq kommýnıkatsııalar qyzmetinde ótken brıfıngide osyndaı statıstıka keltirdi, dep habarlaıdy QazAqparat tilshisi.
«Óńirde týrızmdi damytý boıynsha oblysta 3 negizgi baǵyt aıqyndalǵan. Tarıhı-tanymdyq baǵytta týrısterge 1 770 tarıhı-mádenı eskertkish qyzmet kórsetedi. Ekologııalyq týrız boıynsha oblys aýmaǵynda 4 erekshe qorǵalatyn tabıǵı nysan ornalasqan. Olar: «Aqsý-Jabaǵyly» jáne «Qarataý» qoryqtary, «Saıram-Ógem» ulttyq tabıǵı parki, «Syrdarııa-Túrkistan» óńirlik tabıǵı parki. Ekologııalyq týrızmdi damytý úshin 30 týrıstik marshrýt qurylǵan. Emdik-saýyqtyrý týrızmi baǵytynda 72 emdik saýyqtyrý orny jumys isteıdi. Olardyń syıymdylyǵy 7 940 tósek-orynǵa jetip otyr», - dedi aımaq basshysy.
Sondaı-aq, ákim jyl aıaǵyna deıin 2 emdik-saýyqtyrý keshenin paıdalanýǵa berý josparda bar ekenin aıtty.
«Jalpy, atalǵan baǵyttar boıynsha byltyr oblysqa 470 myńnan astam týrıst jáne 1 mıllıonnan vızıter keldi. Týrızm salasyna 69 mlrd teńge ınvestıtsııa tartyldy. Osy arqyly 19 týrıstik ınvestıtsııalyq joba aıaqtalyp, paıdalanýǵa berildi. Bıyl 35 mlrd teńgeniń 10 jobasy iske qosylady», - dedi Darhan Satybaldy.
