Jyl basynan beri temirjoldarda 72 qazaqstandyq ajal qushqan
ASTANA. QazAqparat - Jyl basynan beri 22 myńnan astam adam temirjol boıyndaǵy belgilenbegen jerlerden ótkeni úshin ákimshilik jaýapkershilikke tartylǵan, dep habarlady kóliktegi ІІD-niń baspasóz qyzmetinen.
Júrgizilgen túsindirý jumystaryna qaramastan, qazaqstandyqtar temirjol kóligi nysandarynda qaýipsizdik erejelerin buzýdy toqtatpaı otyr. Temirjol nysandaryndaǵy jaraqattaný oqıǵalary burynǵy deńgeıde qalyp otyr. «2014 jyldyń 10 aıy ishinde QR ІІM kóliktegi Іshki ister departamentiniń qyzmet kórsetý ýchaskelerinde 121 jaraqattaný faktisi tirkelgen, onyń 72-si ólim-jitimge ákelse, 10 faktisi boıynsha balalar zardap shegip, onyń tórteýinde qaıǵyly oqıǵaǵa ákep soqqan», - dedi departament basshysynyń orynbasary Talǵat Ótetileýov. 31 qazan kúni Aqseńgir stansasy boıynsha Jelilik ishki ister basqarmasyna kezekshiden «Aqseńgir-4030 shaqyrymdaǵy blok beketi» aralyǵynyń 4035 shaqyrymynda júk poıyzy 37 jastaǵy Almaty oblysynyń turǵynyn basyp ketti degen habarlama túsken. Alǵan jaraqattardan ol jan tapsyrǵan. «Qaıǵyly oqıǵalardyń negizgi sebebi belgilenbegen jerlerde joldan ótý, tehnıkalyq qaýipsizdiktiń buzylýy bolyp otyr. Mundaı jaǵdaılardan tek ózi men balalarynyń qaýipsizdigin qamtamasyz etý boıynsha qajetti sharalardy qolǵa alǵandar ǵana saqtana alady», - dedi polıtsııa polkovnıgi. Aıta keteıik, 2014 jyly polıtsııa qyzmetkerleri 22 918 adamdy belgilenbegen jerlerde temirjoldan ótkeni úshin ákimshilik jaýapkershilikke tartty.
