Jyl basynan beri SQO joldarynda 50 adam zardap shekti
PETROPAVL. QazAqparat – Soltústik Qazaqstan oblysynda jyl basynan 35 jol-kólik oqıǵasy tirkelip, saldarynan 4 adam mert boldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Petropavl polıtsııasyna 21 naýryzda bolǵan jol-kólik oqıǵasynda zardap shekken er adamnan aryz kelip túsken.
Jambyl men Pıoner kósheleriniń qıylysynda «Toyota Camry» avtokóliginiń júrgizýshisi, 32 jastaǵy qala turǵyny qarsy baǵyttaǵy jolaqqa shyǵyp ketip, Qyzyljar aýdanynyń 64 jastaǵy turǵynynyń «Audi 80» kóligimen soqtyǵysqan.
«Audi» kóliginiń júrgizýshisi Petropavl qalalyq kópbeıindi aýrýhananyń travmatologııa bólimshesine emdelýge jatqyzyldy.
Aryz túskennen keıin atalǵan fakti «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha tirkeldi.
«Tergeý aıasynda oqıǵany tolyq jáne obektıvti zertteýge baǵyttalǵan qajetti saraptamalar taǵaıyndalady. Júrgizýshilerge maýsymaralyq kezeńde jolda erekshe saqtyq tanytýǵa keńes beremiz. Temperatýranyń tómendeýinen jol betinde muz paıda bolady. Sondyqtan jyldamdyq rejımin saqtap, kólik quraldary arasyndaǵy araqashyqtyqty saqtaý qajet», - deıdi Petropavl qalalyq PB ákimshilik polıtsııa bóliminiń bastyǵy Rústem Tasbolatov.
Barlyǵy 3 aıda SQO joldarynda 35 jol-kólik oqıǵasy tirkelip, 4 adam qaza tapty. 46 adam jaraqat aldy.
Polıtseıler jol qozǵalysynyń barlyq qatysýshylaryna jol júrisi qaǵıdalaryn qatań saqtaýdy eske salady.
