Jyl basynan beri Reseıden ShQO-ǵa 5 myńnan asa týrıst kelgen

ÓSKEMEN. QazAqparat - Bıylǵy 10 aıda Shyǵys Qazaqstanǵa Reseıdiń shekaralyq aımaqtarynan bes myńnan astam týrıst kelgen. Bul sońǵy úsh jylmen salystyrǵanda 4,5 ese kóp, dep habarlaıdy QazAqparat Altaynews agenttigine silteme jasap.

Muny Petropavl qalasynda ótip jatqan Qazaqstan men Reseıdiń týrıstik kórmesi kezinde oblystyq týrıstik aqparat ortalyǵynyń mamandarynan surap bildik.

Eske salaıyq, bul kúnderi Soltústik Qazaqstan oblysynyń ortalyǵynda Qazaqstan men Reseıdiń óńiraralyq yntymaqtastyq forýmy ótýde. Forým aıasynda eki eldiń týrıstik áleýetin pash etýge baǵyttalǵan arnaıy kórme uıymdastyrylǵan-dy.

«Shyǵys Qazaqstanǵa keletin týrıster sany jyl ótken saıyn artyp keledi. Buǵan sońǵy jyldary oblysymyzdaǵy týrıstik ınfraqurylymnyń qarqyndy damýy da óz septigin tıgizip otyr», - deıdi ShQO týrıstik aqparat ortalyǵynyń dırektory Symbat Ramazanov.

Onyń sózin reseılik áriptesi de qoldady. Altaı Respýblıkasy týrıstik aqparat ortalyǵy marketıng bóliminiń meńgerýshisi Sergeı Popovıchtiń aıtýynsha, qazir keri baǵytta saparlaýshylar sany da osydan birneshe jyl burynǵymen salystyrǵanda anaǵurlym artqan.

«Sózsiz, buǵan eki óńir arasyndaǵy joldardyń qalpyna keltirilýi, sondaı-aq turaqty jolaýshylar tasymalynyń bolýy da yqpalyn tıgizdi. Biz Shyǵys Qazaqstan oblysynyń eń jaqyn kórshileriniń birimiz. Sondyqtan baılanysymyz budan da tyǵyz bolyp, sizderden bizge, bizden sizge saparlaıtyn týrıster qarasy jyl saıyn arta beredi dep senemiz», - deıdi ol.