Jyl basynan beri prokýrorlardyń yqpalymen 6 myń jumysshynyń 350 mıllıon teńge zańdy aılyq jalaqylary berildi
ASTANA. Aqpannyń 18-i. QazAqparat /Aıdar Ospanalıev/ - Jyl basynan beri prokýrorlardyń yqpalymen 6 myń jumysshynyń 350 mıllıon teńge zańdy aılyq jalaqylary alynyp berilgen.
Bul málimetterdi búgin Bas prokýratýranyń resmı ókili Nurdáýlet Súıindikov jýrnalıstermen bolǵan aptalyq brıfıngte keltirdi, dep habarlaıdy QazAqparat.
Onyń derekterine qaraǵanda, qazirgi tańda jumysshylardyń taǵy 100 mıllıon teńge jalaqylaryn berý jónindegi prokýrorlyq qadaǵalaý aktileri oryndalý ústinde. «Bul máselege naqty toqtalatyn bolsaq, Aqmola oblysyndaǵy «Kókshetaý jylý» kásipornynyń ókilderi tek prokýrorlardyń yqpal etýimen ǵana 30 mıllıon teńge jalaqyny zańdy ıelerine berdi. Al Qyzylordada «Qumkól-Servıs» jaýapkershiligi shekteýli seriktestigi prokýrordyń talap aryzy negizinde 28 mıllıon teńge aılyq jalaqyny tóleýge májbúr boldy. Sondaı-aq Soltústik Qazaqstan oblysynyń Aqqaıyń aýdanynyń prokýratýrasy «Cherkasskoe» jaýapkershiligi shekteýli seriktestigine 600 jumysshynyń 29 mıllıon teńgesin tólep berýge májbúrledi, dedi resmı ókil.
