Jyl basynan beri prokýrorlar 1,5 mıllıard teńgeden asatyn aılyq jalaqynyń tólenýine yqpal etip, 32 myń eńbekkerdiń buzylǵan quqyqtaryn qalpyna keltirdi
ASTANA. Naýryzdyń 18-i. QazAqparat /Aıdar Ospanalıev/ - Prokýratýra organdary azamattardyń eńbek jáne áleýmettik quqyqtaryn qorǵaý jumystaryn jalǵastyrýda. Jyl basynan beri olar azamattardyń 1,5 mıllıard teńgeden asatyn aılyq jalaqylaryn alýyna yqpal etip, 32 myń eńbekkerdiń buzylǵan quqyqtaryn qalpyna keltirdi.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdálet Súıindikov málim etti, dep habarlaıdy QazAqparat.
Onyń derekteri boıynsha, Almatyda prokýrorlardyń yqpalymen «Temirbeton» jaýapkershiligi shekteýli seriktestiginiń ókilderi 400 jumysshynyń 10 mıllıon teńgeden asatyn aılyq jalaqylary boıynsha qaryzdaryn ótedi. Al Soltústik Qazaqstan oblysyndaǵy «Krasnopolıanskoe» seriktestigi jumysshylarǵa 12 mıllıon teńge kólemindegi bereshekterin qaıtardy. «Azamattardyń eńbek quqyqtaryn buzǵandardy jaýapqa tartý máselesi prokýratýranyń basty nazarynda. Mysaly Atyraý oblysynyń Jylyoı aýdanynyń prokýrorlary «Nur Jylyoı» jaýapkershiligi shekteýli seriktestiginiń jetekshisine aılyq jalaqyny birneshe ret keshiktergeni úshin qylmystyq is qozǵady», dedi resmı ókil.
