Jyl basynan beri otbasynda janjal shyǵarǵan 4 myńnan astam adam qamaýǵa alyndy

ASTANA. QazAqparat – Bıyl 3 aıda otbasynda zábir kórsetker agressorlarǵa qatysty 17,5 myń ákimshilik hattama sotqa joldandy. Ortalyq kommýnıkatsııalar qyzmetinde ótken brıfıngide ІІM Ákimshilik polıtsııa komıteti tóraǵasynyń orynbasary Renat Zulqaıyrov osylaı málim etti, dep habarlaıdy QazAqparat tilshisi.

«Aǵymdaǵy jylǵy 3 aıda jábirlenýshilerdiń qaýipsizdigin qamtamasyz etý úshin 26 myńǵa jýyq qorǵaý nusqamasy shyǵaryldy. Agressorlarǵa qatysty 17,5 myń ákimshilik hattama sotqa joldandy», - dedi Renat Zulqaıyrov.

Onyń málimetinshe, atalǵan ister boıynsha sot sheshimimen kinálilerge kelesi jaza túrleri qoldanyldy:

– 4 myńnan astam adam qamaýǵa alyndy;

– 3 myńǵa jýyq adamǵa eskertý jasaldy;

- 543 adamǵa aıyppul salyndy.

«Polıtsııanyń ótinishi boıynsha sottar quqyq buzýshylardyń minez-qulqyna 4 myń erekshe talap ornatyp, 2,6 myń alkogoldik ishimdikterdi tutynýǵa tyıym salyndy. Olardyń barlyǵyn ýchaskelik polıtsııa ınspektorlary, quqyq buzýshynyń minez-qulqyn baqylaýdy júzege asyrýǵa múmkindik beretin profılaktıkalyq esepke qoıdy. Nátıjesinde, belgilengen shekteýlerdi buzǵany úshin 2 myń «otbasylyq tırandar» ákimshilik jaýapkershilikke tartyldy», - dep toqtaldy ol.

Sondaı-aq, Renat Zulqaıyrov otbasylyq zorlyq-zombylyq qurbandarynyń 60% polıtsııaǵa aryz túsirýden bas tartatynyn aıtty.