Jyl basynan beri óndiristegi qaıǵyly oqıǵalar kórsetkishi tómendedi

ASTANA. QazAqparat - 2016 jylǵy 1 shildedegi málimetter boıynsha respýblıkadaǵy kásiporyndar men uıymdarda qaıǵyly oqıǵalar saldarynan 792 adam zardap shekti. Bul ótken jyldyń sáıkes kezeńimen salystyrǵanda 5,6%-ǵa tómen boldy (2015 jyly - 839 adam), dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti habarlady.

Óndiriste ólim-jitimmen aıaqtalǵan qaıǵyly oqıǵalar saldarynan zardap shekken adamdar sany 112 bolyp otyr (2015 jyldyń 6 aıynda - 113 adam).

2011 jyldan bastap memlekettik organdar men jumys berýshilerdiń Qazaqstandaǵy eńbek qaýipsizdigi men ony qorǵaý salasyndaǵy qabyldaǵan keshendi sharalary nátıjesinde óndiristegi qaıǵyly oqıǵalar kórsetkishiniń tómendeýi baıqalyp otyr. Atalǵan ýaqyt aralyǵynda jalpy óndiristik jaraqat alý kórsetkishi 23,3%-ǵa tómendep, 2015 jyly 1 723 adam boldy (2011 jyly 2 217 adam).