Jyl basynan beri óńdeý ónerkásibiniń ósimi 106 paıyzdan asty - Indýstrııa mınıstri

NUR-SULTAN. QazAqparat – 2022 jyldyń birinshi toqsanynda óńdeýshi ónerkásiptiń jıyntyq ósimi 106,5 paıyzdy qurady. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«2022 jylǵy birinshi toqsanda óńdeýshi ónerkásipte oń úrdis baıqalyp, jıyntyq kórsetkish 106,5 paıyzdy qurady. Mashına jasaý salasynda 11,3 paıyz ósim boldy. Avtokólik quraldaryn, treılerler men jartylaı tirkemelerdi, mashınalar men jabdyqtardy shyǵarý, ózge kólik quraldaryn, kompıýterler, elektrondyq jáne optıkalyq jabdyqtardy, elektr jabdyqtaryn óndirý, jóndeý jáne ornatý artty. Tústi metallýrgııada naqty kólem ındeksi 106,1 paıyzdy qurady. Tazartylǵan mys, quıma altyn, katodty mys, tazartylǵan altyn shyǵarý kólemi ulǵaıdy», - dedi mınıstr.

Onyń dereginshe, qara metallýrgııada óndiris kólemi 1,9 paıyzǵa artty.

Bolat, shoıyn, armatýralyq prokat, relster, fasondyq prokat, ferrosılıtsııa, bolat qubyrlar óndirisi ulǵaıdy.

Qurylys materıaldary óndirisi 112,4 paıyz boldy.

Oǵan jylý oqshaýlaǵysh materıaldar, betonnan jasalǵan buıymdar óndirisi), taýar betony, kirpishter jáne qurylys eritindileri óndirisiniń artýy esebinen qol jetkizildi.

«Hımııa ónerkásibinde óndiris kólemi 7,8 paıyzǵa artty. Sary fosfor, fosfor-kalııli tyńaıtqysh, azyqtyq trıkaltsıı-fosfaty, ammıak selıtrasy, ammıak suıyq, azot qyshqyly, eritindidegi tehnıkalyq kúıdirgish natr, hlor ósti. Jeńil ónerkásipte óndiris 10,6 paıyzǵa ósti. Oǵan toqyma buıymdary, kıim jáne bylǵary ónimder óndirisiniń ósýi oń áser etti», - dedi Qaıyrbek Óskenbaev.