Jyl basynan beri myńnan asa astanalyqty ıt qaýip alǵan
ASTANA. QazAqparat - Jyl basynan beri qalada 1800-ge jýyq adam úı janýarlary men ıesiz janýarlardan zardap shekti. It pen mysyqtan zardap shekkenderdiń 37,7% 14 jasqa deıingi balalar, dep habarlaıdy elorda ákimdiginiń medıa ortalyǵy.
«Astana vetservıs» JShS-niń málimetine sáıkes, zardap shekkenderdiń 60 paıyzyn qańǵybas ıt qapqan.
«2017 jyldyń basynan beri qala boıynsha mysyq tyrnap, ıt qapqan 1 777 oqıǵa tirkeldi. 2016 jyldyń sáıkes kezeńimen salystyrǵanda bul kórsetkish tómendegen. Ótken jyly osy kezeńde 1838 oqıǵa tirkelgen bolatyn», - dedi Astana vetservıs ókili qalalyq ákimdikte ótken apparat otyrysynda.
«Astana vetservıs» JShS búginge deıin 5457 qańǵybas ıt pen 569 mysyqty aýlady. Mamandardyń aıtýynsha, qaladaǵy qańǵybas ıt-mysyqtardyń kóbeıýi eski jáne apatty dep tanylǵan turǵyn úılerdi súrý kezinde oryn alýda. Atap aıtqanda, turǵyndar úılerinen kóshken kezde ıt-mysyqtaryn qaraýsyz qaldyryp ketetin kórinedi. Saldarynan ıesiz ıt-mysyqtar sany artýda.
Bul máselege qatysty Astana qalasynyń ákimi Áset Isekeshev tıisti basqarmalarǵa tapsyrma júktedi.
«Turǵyn úı basqarmasy apatty jaǵdaıdaǵy úılerdi kúreý jáne turǵyndardy kóshirý kezinde úı janýarlarynyń bar-joǵyn anyqtap, qajet bolǵan jaǵdaıda tizimin jasaý kerek, ıaǵnı turǵyndarǵa ıt-mysyqtarynyń qaıda jáne qalaı tapsyrýǵa bolatyny týraly aqparat berilýi tıis», - dedi Astana ákimi Á.Isekeshev.
Sonymen qatar, ákim Jergilikti polıtsııa qyzmetine qoldanystaǵy zańǵa sáıkes ıtter qaraýsyz júrgen bolsa ıesine eskertý jasaý, al adamdy qapqan jaǵdaıda aıyppul tóletý kerektigin aıtty.
