Jyl basynan beri munaı tasymaly ótken jylmen salystyrǵanda 7,6 paıyzǵa artty - A.Dýnaev
ASTANA. Shildeniń 27-i. QazAqparat /Aıdar Ospanalıev/ - Elimizdegi iri ulttyq kompanııalardyń óndiris josparlary tolyqtaı oryndalýda.
Atap aıtqanda jyl basynan beri munaı men gaz kondensaty byltyrǵy jyldyń sáıkes kezeńimen salystyrǵanda 3 paıyzǵa artty. Bul týraly búgin úkimettiń keńeıtilgen otyrysynda «Samuryq-Qazyna» ál-aýqat qory basqarma tóraǵasynyń orynbasary Arman Dýnaev málim etti.
Onyń derekteri boıynsha, munaı tasymaly bıylǵy jyldyń basynan beri 7,6 paıyzǵa artsa, gaz tasymaly 11,9 paıyzǵa ósken.
Al shıkizatty qaıta óńdeý kólemi 58,2 paıyzǵa kóbeıdi.
Sondaı-aq «Qazaqstan temir joly» kompanııasynyń kórsetkishteri boıynsha tarıftik taýarlar aınalymynyń ósimi 13,6 paıyzdy qurap, júk tasymaly 16,1 paıyzǵa ósken. «Biz «QazAtomÓnerkásip» kompanııasy josparlarynyń da oryndalatynyna senimdimiz. Sebebi berılıı óndirisi alǵashqy jartyjyldyqta 90 paıyzǵa oryndalsa, ýran óndirisi 42,5 paıyzǵa artyp otyr. Elektr energııasyn óndirý kólemi de 6 myń 775 mıllıard kılovatqa kóbeıdi», dedi basqarma tóraǵasynyń orynbasary.
Onyń derekteri boıynsha, «Eır Astana» kompanııasymen tasymaldanǵan jolaýshylar sany 4,3 paıyzǵa artyp, poshta arqyly júk tasymaly 26,6 paıyzǵa kóbeıdi. «Sondaı-aq ındýstrııalandyrý kartasyna engen jobalardy iske asyrý maqsatynda Premer-Mınıstrdiń aǵymdaǵy jylǵy aqpan aıynyń 13-indegi ókimimen Respýblıkalyq basqarýshy ortalyq qurylyp, onyń aıasynda 19 iri jobany iske asyrý qamtamasyz etilýde», dedi A.Dýnaev.
