Jyl basynan beri QR Parlamenti Senaty 43 halyqaralyq kelisimshartty qabyldady
ASTANA. Jeltoqsannyń 28-i. QazAqparat /Qanat Mámetqazyuly/ - Jyl basynan beri QR Parlamenti Senaty 43 halyqaralyq kelisimshartty qabyldady. Búgin aǵymdaǵy jyl ishinde Parlament Senatynyń atqarǵan jumystaryn qorytyndylaýǵa arnalǵan baspasóz máslıhatynda Senat apparatynyń basshysy Murat Nurtileýov osylaı málim etti,
dep habarlaıdy QazAqparat.
«2009 jyly Parlament tarapynan 43 halyqaralyq kelisimshart ratıfıkatsııalandy. Atap aıtqanda, Palata «Kıoto hattamasyna qosylý týraly», «Kedendik odaq qurý týraly», «Azamattyq jáne saıası quqyqtar týraly paktige fakýltatıvtik hattama» sekildi mańyzdy qujattardy bekitti. Sondaı-aq palata birqatar memlekettermen, Qazaqstannyń halyqaralyq quqyq sýbektilerimen aradaǵy yntymaqtastyqty arttyrýǵa baǵyttalǵan ekijaqty qujattardy qabyldady. Bunymen qosa, bıyl depýtattyq korpýstyń bastamasymen 6 zań jobasy qabyldandy», dedi M. Nurtileýov.
Onyń aıtýynsha, aǵymdaǵy jylǵy zań shyǵarmashylyǵy qyzmeti barysynda Parlament 67 zań aktilerine qatysty ózgerister men tolyqtyrýlardy qabyldaǵan. Bundaı qujattar boıynsha elimizdiń búgingi damýy men qoǵam úshin mańyzy zor zańdar retinde Apparat basshysy qazaqstandyqtardyń quqy men bostandyǵyn qorǵaýǵa, jemqorlyqpen kúresti kúsheıtýge, ekonomıkany damytý salasyna, qazaqstandyq qamtylymnyń artýyn qamtýǵa arnalǵan jáne taǵy da basqa zańdardy atap ótti.
«Memlekettik-áleýmettik saıasattyń negizgi baǵyttarynyń biri azamattardyń ómir súrý sapasyn, turmysyn jaqsartý bolyp tabylady. Parlament bul baǵytta da birqatar zańdar toptamasyn qabyldady. Atap aıtqanda, azamattardyń jekelegen sanattaryn qoldaýǵa, tegin medıtsınalyq kómek mólsherin arttyrýǵa arnalǵan, sonymen qatar áleýmettik qamsyzdandyrý týraly zańdardy qabyldady», dedi M. Nurtileýov.
