Jyl basynan beri kópbalaly analar 214,2 mlrd teńge kóleminde járdemaqy aldy

NUR-SULTAN. QazAqparat - 2020 jylǵy qańtar-qarasha aralyǵynda jalpy somasy 214,2 mlrd teńgege 389,2 myń otbasy kópbalaly januıalarǵa arnalǵan memlekettik járdemaqymen qamtyldy. Qarasha aıynda osy járdemaqy túrin jalpy somasy 22,5 mlrd teńgege 413,4 myń otbasy aldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmetine siltememen.

Atalǵan memlekettik járdemaqyǵa 4 jáne odan kóp birge turatyn kámeletke tolmaǵan nemese kúndizgi bólimde oqıtyn 23 jasqa deıingi stýdent balalary bar otbasylar tabysyna qaramastan úmitker bola alady. Tólem mólsheri balalardyń sanyna baılanysty 44 532 teńgeden (4 bala) 77 951 teńgege (7 bala) deıin, 8 jáne odan keıingi ár balaǵa 4 AEK-ten saralanǵan.

8 balasy bar otbasy úshin járdemaqy 88 896 teńgeni quraıdy, 9 balaǵa – 100 008 teńge, 10 – 111 120 teńge, 11 - 122 232 teńge, 12 – 133 344 teńge, 13 – 144 456 teńge, 14 – 155 568 teńge, 15 - 166 680 teńge, 16 – 177 792 teńge tólenedi.

Eske sala keteıik, Qazaqstandaǵy kópbalaly otbasylarǵa olardyń kiristerin esepke almaı beriletin jańa memlekettik járdemaqy 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde qarastyrylǵan tabysy az jáne kópbalaly otbasylardy qoldaýdyń úsh negizgi baǵyty aıasynda engizildi.

2020 jylǵy 13 mamyrda Memleket basshysy 8 jáne odan da kóp balasy bar otbasylar úshin jekelegen mólsherlerdi belgileý arqyly osy járdemaqyny keńeıtýdi qamtamasyz etetin zańǵa qol qoıdy. Zań 2020 jylǵy 1 qańtardan bastap kúshine endi, osyǵan baılanysty kópbalaly otbasylarǵa beriletin járdemaqy mólsheri ony taǵaıyndaǵan sátten bastap qaıta esepteldi. Máselen, aǵymdaǵy jyldyń shilde aıynda atalǵan otbasylar jańa mólsherde járdemaqy, sondaı-aq qańtar-maýsym aılarynda qalyptasqan aıyrmany aldy.