Jyl basynan beri kolonııaǵa esirtki ótkizý boıynsha 30-ǵa jýyq qylmystyq is qozǵaldy - ІІM QAJK
ASTANA. 10 sáýir. QazAqparat - BAQ-tardaǵy esirtkige qarsy nasıhatqa qaramastan, ony kolonııaǵa ótkizý máselesi kókeıkesti bolyp otyr.
Bul haqynda ІІM QAJK baspasóz qyzmeti málim etti.
Qaraǵandy oblysynda keshe AK-159/17 mekemesiniń qorshaýy arqyly býyp-túıilgen eki zatty laqtyrýǵa árekettengen Shahtınsk qalasynyń 35 jastaǵy turǵyny quryqtaldy. Sot-hımııalyq saraptama onda geroın jáne marıhýanna oralǵanyn anyqtaǵan. Salmaǵy 64 gramdyq geroın júzdegen adamnyń shamadan tys esirtkige eltýine jetkilikti edi. Atalmysh oqıǵaǵa sáıkes qylmystyq is qozǵalyp, qolǵa túsken adam ýaqytsha ustaý abaqtysyna toǵytyldy.
JD-158/1 mekemesiniń (Taraz qalasyndaǵy tergeý ızolıatory) mamandary azyq-túlikti jáne kıimderdi tintý barysynda «Steıt laın» markaly temekige esirtki salynǵan jeti tselofan paket tapty. Sot-hımııalyq saraptama munyń geroın ekenin rastady. Sálemdemeni jetkizgen áıelge eshqaıda ketpeý sharasy qoldanyldy.
Batys Qazaqstan oblysynda RÝ-170/2 kolonııasynyń qorshaýynan esirtki laqtyrýǵa tyrysqan osy óńirdiń 20 jastaǵy turǵyny qolǵa tústi. Tárkilengen geroın saǵyzdyń qorabyna salynyp, skotchpen oralǵan eken.
OV-157/17 mekemesiniń (ShQO Jarma aýdanynyń Shýaq eldi mekeni) irgeles aýmaǵynan túngi saǵat 11-de er adam ustalǵan. Ol 40 gramm marıhýanany qorshaý arqyly laqtyrǵan. Oǵan qatysty qylmystyq is qozǵaldy.
10 sáýir kúni kolonııaǵa ótkizilmek bolǵan 13 keli esirtki tárkilendi. Bul ótken jyldyń sáıkes merzimimen salystyrǵanda eki ese kóp. Abaqtyǵa esirtki ótkizýge árekettengen tulǵalardyń ústinen 30-ǵa jýyq qylmystyq is qozǵaldy. Sondaı-aq rejımdi nysanǵa spırttik ishimdik, aqsha, uıaly telefon jetkizýge tyrysqan taǵy 147 adam QR Ákimshilik quqyqbuzýshylyqtar týraly kodekstiń 367 babyna sáıkes ákimshilik jaýapkershilikke tartylǵan.
