Jyl basynan beri qoldan jasalǵan 139 aqsha belgisi anyqtaldy - Ulttyq bank
Ulttyq banktiń banknottar men monetalardy saraptaý basqarmasynyń bastyǵy Asqat Muqamadıevtiń aıtýynsha, k óp jaǵdaıda nomınaly 2 000 teńgelik banknottar (97 dana) qoldan jasalǵan. Olar jalpy kólemniń 70%-yn quraıdy. Nomınaly 5 000 teńgelikten – 15 dana (11%), 10 000 teńgelikten 10 dana (7%) aqsha qoldan jasalǵan. Qalǵan 9%-y ózge nomınaldaǵy banknottarǵa tıesili.
«Jalǵan banknottardyń kóp bóligi Almatyda – 68 dana (jalpy kólemniń 51%-y), Nur-Sultan qalasynda – 16 dana jáne Shyǵys Qazaqstan oblysynda 29 dana anyqtaldy. Ulttyq bank túpnusqa banknottardy qoldan jasalǵan aqshadan ajyratýǵa kómektesetin qarapaıym qaǵıdalardyń bar ekenin eske salady. Banknottarda beder týdyratyn arnaıy mór bar. Sol sııaqty barlyq banknottarda kórý qabileti nashar adamdarǵa arnalǵan, qolmen ustaǵanda jaqsy bilinetin dóńes tárizdi joǵary bederli element túrindegi belgiler bar», - dedi vedomstvo ókili.
Banknottyń túsi anyq jáne kontrastyly bolýǵa tıis, sý tańbasy men nomınaldyń tsıfrlyq beınesin kórý úshin banknotty jaryqqa baǵyttap kórý qajet.
Banknot betindegi jazýlary bar tutas jip tárizdes, jaryqta anyq kórinetin jazýlar bar úzik syzyq túrindegi tutas magnıttik jáne súńgýir jipke de nazar aýdarǵan jón.
Nomınaly 1 000, 2 000, 5 000, 10 000 jáne 20 000 teńgelik banknottarda túrli-tústi boıaýmen salynǵan sýret túrindegi beıneler bar. Banknottyń kólbeý buryshy ózgergen kezde beınelerdiń túsi jasyldan altyn túske deıin ózgeredi.
«Kýpıýrany osy ádispen tekserýge birneshe mınýt ýaqyt ketedi jáne ol banknottyń túpnusqasyn anyqtaýǵa kómektesedi. Shyn aqshany jalǵan banknottan qalaı ajyratýǵa bolatyny týraly aqparatpen Qazaqstan Ulttyq Bankiniń saıtynda tolyǵyraq tanysýǵa bolady», - dep atap ótti maman.
