Jyl basynan beri keden organdarynyń jaýapty qyzmetkerlerine qatysty 81 qylmystyq is qozǵaldy
azannyń 19-y. QazAqparat /Aıdar Ospanalıev/ -Bıylǵy jyl basynan beri keden organdarynyń jaýapty qyzmetkerlerine qatysty 81 qylmystyq is qozǵalǵan. Bul týraly búgin Kedendik baqylaý organdarynyń 9 aıda atqarǵan jumystaryna baılanysty jýrnalıstermen bolǵan brıfıngte Qarjy mınıstrliginiń Kedendik baqylaý komıtetiniń resmı ókili Erjan Baıtanaev málim etti.
Onyń sózine qaraǵanda, qazirgi tańda Kedendik baqylaý komıteti sybaılas jemqorlyq máselesine jiti kóńil bólip, onymen kúreste júıeli sharalar qoldanýda. Kedenshiler ásirese jemqorlyq áreketteriniń aldyn alý máselesine barynsha kóńil bólip otyr. «Osyǵan qaraı qozǵalǵan qylmystyq isterdiń 56-syn keden qyzmetkerleriniń ózderi jáne ishki qaýipsizdik qyzmetkerleri ózge organ ókilderimen birlesken sharalardyń nátıjesinde anyqtady. Qozǵalǵan qylmystyq isterdiń 28-i sotqa joldandy. Osy rette aıta ketetin másele, «Astana - jańa qala» keden beketiniń Bas esepshisi Tekebaevaǵa qatysty «10 mıllıon teńgeniń senip tapsyrylǵan múlkin talan-tarajǵa saldy» degen aıyppen ishki qaýipsizdik qyzmeti qozǵaǵan qylmystyq is boıynsha azamatsha aıypty dep tabylyp, 5 jylǵa bas bostandyǵynan aıyryldy», dedi resmı ókil.
