Jyl basynan beri Keden odaǵy elderimen saýda aınalymy edáýir tómendedi - Statıstıka agenttigi

ASTANA. QazAqparat - Jyl basynan beri syrtqy saýda aınalymy 7 paıyzǵa tómendedi. Oǵan Keden odaǵy elderimen aradaǵy saýda aınalymynyń tómendeýi basty sebep bolyp otyr. Bul týraly búgin QR Ulttyq ekonomıka mınıstrliginiń Statıstıka komıtetinde ótken baspasóz máslıhatynda komıtet tóraǵasy Álıhan Smaıylov málim etti.

«Jyl basynan beri syrtqy saýda aınalymy 7 paıyzǵa tómendedi. Oǵan Keden odaǵy elderimen aradaǵy saýda aınalymynyń tómendeýi basty sebep bolyp otyr. Sebebi, qazirgi tańda Reseı Federatsııasynyń ekonomıkalyq ósýi tómendep barady. Tıisinshe, Reseıdegi qazaqstandyq eksport taýarlarynyń tutynylýy men olarǵa degen suranys ta azaıdy. Sondyqtan, Qazaqstannyń Reseıge degen eksporty da sáıkesinshe azaıa bastady. Naqty aıtatyn bolsaq, 2014 jyldyń qańtar-shilde aılary ishinde 21 paıyzǵa tómendedi», - dep atap ótti ol. Tóraǵanyń aıtýynsha, atalǵan merzim aralyǵynda jalpy Keden odaǵy elderimen saýda aınalymy 10 mlrd. 739 mln. AQSh dollaryn qurady. Sonyń ishinde eksport 2 mlrd. 915 mln. AQSh dollary boldy. «Sondaı-aq, Keden odaǵy elderinen bizge kelgen ımport kólemi de qańtar-shildede 22,9 paıyzǵa tómendep, 7 mlrd. 824 mln. AQSh dollaryn qurady. Oǵan eń basty sebep bolǵan jyldyń basyndaǵy aıyrbas baǵamynyń túzetilýi», - dep túsindirdi Á. Smaıylov.