Jyl basynan beri Qazaqstannyń syrtqy saýda taýar aınalymy 72,8 mlrd dollardan asty

NUR-SULTAN. QazAqparat – QR Ulttyq ekonomıka mınıstri Áset Erǵalıev elimizde óńdelgen taýarlar eksporty ulǵaıǵanyn aıtty, dep habarlaıdy QazAqparat.

«Bıylǵy qańtar-qyrkúıek aılarynda syrtqy saýda taýar aınalymy 72,8 mlrd dollaryn qurap, onyń ishinde eksport boıynsha kórsetkish 43,3 mlrd dollaryna deıin jetti. Bul rette, óńdelgen taýarlar eksporty 25,5%-ǵa ósip, 14 mlrd dollarǵa deıin jetti», - dedi mınıstr Úkimettiń búgingi otyrysynda.

Spıkerdiń aıtýynsha, bıyl taýarlar ımporty 29,5 mlrd dollardy quraǵan.

«Jalpy, oń saýda balansy ótken aıǵa qaraǵanda 1,8 mlrd dollarǵa ósip, 13,8 mlrd dollarǵa jetti», - dedi Á. Erǵalıev.

Buǵan deıin mınıstr bıylǵy 10 aıdaǵy elimizdiń ekonomıkalyq damýy týraly baıandaǵan edi.

Bıylǵy qańtar-qazan aılarynda Qazaqstan ekonomıkasynyń ósý kórsetkishi 3,5%-dy qurady. Osy kezeńde negizgi trendter boıynsha qyzmet kórsetý sektoryndaǵy ósý qarqynynyń jedeldeýi, óńdeý ónerkásibi men qurylys salalarynyń ekonomıkanyń ósýi men turaqtylyǵynyń draıverleri bolyp qala berýi, eksporttyń joǵary ósim dınamıkasy, óndirýshi emes sektorlardaǵy joǵary ınvestıtsııalyq belsendiliktiń saqtalýy baıqaldy.