Jyl basynan beri Qazaqstanǵa syrttan 83,4 mlrd teńge kirgen
NUR-SULTAN. QazAqparat - Qańtar-naýryz aralyǵynda halyqaralyq qarjy aýdarý júıeleri arqyly elimizge syrttan 83,4 mlrd teńge kirgen, dep habarlaıdy QazAqparat tilshisi Ranking.kz-ke silteme jasap.
Taldaý ortalyǵynyń habarlaýynsha, byltyr Qazaqstandaǵy aqsha aýdarymdarynyń kólemi 362 mlrd teńgege jetken. Al bir shottan ekinshisine tikeleı qarjy aýdarý operatsııalarynyń sany 10% artyp, 1,5 mln-ǵa jetken. Bir aýdarymnyń ortasha túbirtegi 7,5% ulǵaıyp, 238,8 myń teńgeni quraǵan.
«Qazaqstanǵa qarjy aýdarylǵan elder arasynda alǵashqy úsh aıdyń nátıjesi boıynsha Reseı Federatsııasy kósh bastap tur. 2018 jyldyń qańtar-naýryz aralyǵyndaǵy kórsetkishpen salystyrsaq, ósim 36,3% jetip, 36 mlrd teńge boldy. Al tranzaktsııalar sany 23,8% artyp, 193 myń myńǵa jetti. Aqsha aýdarymyndaǵy Reseıdiń úlesi - 43,2%» - delingen aqparatta.
Ekinshi orynda 15 mlrd teńgemen Koreıa Respýblıkasy tur. Bul elden jasalǵan tranzaktsııalar sany - 39,3 myń. Esesine bir aýdarymnyń ortasha túbirtegi - 351,3 myń men 382,9 myń teńge aralyǵynda bolǵan. Koreıanyń jalpy aýdarymdaǵy úlesi - 18%.
Qazaqstan aýmaǵyna qomaqty qarajat aýdarylǵan elderdiń ishinde Ózbekstan, Qyrǵyzstan, AQSh, Germanııa, Túrkııa, Tájikstan jáne BAÁ bar.
Al aqsha aýdarý júıeleriniń ishinde aldyńǵy oryndardy «Zolotaıa Korona», «Western Union», «MoneyGram» úshtigi ózara bólisip tur.
