Jyl basynan beri Qazaqstanǵa 800 myńǵa tarta ózbekstandyq týrıst kelgen

TAShKENT. QazAqparat - Qazaqstan ózbekstandyqtar úshin eń tanymal ekinshi týrıstik baǵytqa aınaldy, dep habarlaıdy QazAqparattyń menshikti tilshisi.

Ózbekstan memlekettik statıstıka komıtetiniń málimetinshe, 1 qazandaǵy kórsetkish boıynsha bıyl 3,9 mıllıon ózbek týrıstik maqsatpen shetelge shyqqan.

Ózbekstan azamattary kóbine kórshi elderge barady. Olardyń eń kóp baratyny Qyrǵyzstan, onda 1877 myń ózbek barǵan.

Týrısterdiń qyzyǵýshylyǵyn arttyrǵan ekinshi baǵyt Qazaqstan boldy. Jyl basynan beri elimizge Ózbekstannyń 774,1 myń azamaty kelgen.

Úshinshi orynda Tájikstan. 535,1 myń ózbekstandyq týrıst Tájikstandy tańdaǵan.

Tórtinshi jáne besinshi qatarda Túrkııa men Reseı tur. Bul elderge tıisinshe 239,1 myń jáne 195,7 myń ózbekstandyq týrıst kelgen.

Buǵan deıin aǵymdaǵy jyldyń 8 aıynda Ózbekstanǵa 900 myńnan astam qazaqstandyq týrıst barǵanyn habarlaǵan bolatynbyz.