Jyl basynan beri qazaqstandyqtarǵa 223 mlrd teńge zeınetaqy tólendi

NUR-SULTAN. QazAqparat - 2021 jylǵy qańtarda respýblıkalyq bıýdjetten zeınetaqy tólemderine 223,3 mlrd teńge, onyń ishinde bazalyq zeınetaqy tóleýge – 68,4 mlrd teńge, yntymaqty zeınetaqyny tóleýge – 154,9 mlrd teńge baǵyttaldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

2021 jylǵy 1 aqpandaǵy jaǵdaı boıynsha zeınetkerler sany 2 mln. 243 myń adamdy quraıdy.

2021 jylǵy 1 aqpandaǵy jaǵdaı boıynsha zeınetaqy tólemderiniń ortasha mólsheri (bazalyq zeınetaqy tólemin eskere otyryp) – 100 075 teńge.

Eske salaıyq, 2018 jylǵy 1 shildeden bastap memlekettik bazalyq zeınetaqy tólemi ár alýshyǵa zeınetaqy júıesine qatysý ótilin eskere otyryp jeke taǵaıyndalady.

Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder (budan ári - MZJ) zeınetaqy júıesine qatysý ótilge qosylady.

Sonymen, eger zeınetaqy júıesine qatysý ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54%-yn quraıdy, sodan keıin 10 jyldan asqan ár jyl úshin onyń mólsheri 2%-ǵa artady. Mysaly, eger qatysý ótili 20 jyl bolsa, bazalyq zeınetaqy eń tómen kúnkóris deńgeıiniń 74%-yn, 30 jyl – eń tómen kúnkóris deńgeıiniń 94%-yn quraıdy. Jumys ótili 33 jáne odan da kóp jyl bolsa, eń tómen kúnkóris deńgeıiniń 100%-y mólsherinde belgilenedi.

Eger bir aı ishinde Biryńǵaı jınaqtaýshy zeınetaqy qoryna birneshe ret MZJ jasalsa, jınaqtaýshy júıege qatysý merzimi bir aıdy quraıdy.

Osylaısha, mindetti zeınetaqy jarnalary neǵurlym turaqty jáne tolyq salynatyn bolsa, zeınetaqy jasyna jetkende bazalyq zeınetaqy tólemderiniń mólsheri soǵurlym kóp bolady.

Óz kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńde alynǵan ortasha aılyq tabysqa baılanysty bolyp keledi.