Jyl basynan beri qazaqstandyqtardyń bazalyq zeınetaqysy 5 paıyzǵa ósti

NUR-SULTAN. QazAqparat – Elimizde yntymaqty jáne bazalyq zeınetaqynyń kólemi qandaı jáne bıyl ol qansha paıyzǵa ósti? QR Eńbek jáne halyqty áleýmettik qorǵaý mınıstrligi búgingi zeınetaqy jaǵdaıyna qatysty túsinikteme berdi, dep habarlaıdy QazAqparat.

«Elimizde 2 mln 236 myńnan astam zeınetker turady. Árbir azamattyń qarttyq shaǵyn laıyqty qamtamasyz etip, qamqorlyq jasaý Úkimettiń áleýmettik saıasatynyń negizgi mindetteriniń biri. Búginde memleket zeınetaqy júıesin jetildirý boıynsha turaqty negizde sharalar qabyldap jatyr. Máselen, bıyl 1 qańtardan bastap yntymaqty zeınetaqynyń mólsheri 7%-ǵa, bazalyq zeınetaqynyń mólsheri 5%-ǵa ósti. Sondaı-aq, 2018 jylǵy 1 shildeden bastap bazalyq zeınetaqy kólemi zeınetkerdiń eńbek ótiline qaraı saralanyp belgilenedi», - dep habarlaıdy mınıstrlikten.

Eńbekmınniń málimetinshe, qazirgi ýaqytta elimizde bazalyq zeınetaqynyń eń tómengi mólsheri 18,5 myń teńge bolsa, eń joǵary mólsher 39,3 myń teńgeni quraıdy. Al bıyl 1 qyrkúıektegi jaǵdaı boıynsha qazaqstandyqtar alatyn ortasha zeınetaqy mólsheri 31,1 myń teńgeni quraıdy eken.

«2021 jylǵy 1 qyrkúıektegi jaǵdaı boıynsha yntymaqty zeınetaqynyń ortasha mólsheri 68,8 myń teńgeni, eń joǵary mólsheri – 100,6 myń teńgeni, eń tómengi mólsheri – 43,3 myń teńgeni quraıdy», - delingen habarlamada.

Buǵan deıin habarlaǵanymyzdaı, elimizde qarttardy qoldaýǵa arnalǵan 2025 jylǵa deıingi jospar bekitildi.

Sondaı-aq, Qazaqstanda qarttardy qoldaýǵa arnalǵan áleýmettik kómek tizimi jarııalandy .