Jyl basynan beri qazaqstandyqtar 100 mlrd teńgeden astam aqshasyn qumar oıynǵa jumsaǵan – mınıstr

ASTANA. QazAqparat – Elorda ákimdiginde ótken «Qoǵammen seriktestikte qoǵamdyq qaýipsizdikti qamtamasyz etý» tujyrymdamasy aıasynda Astanadaǵy máseleler kartasyn tanystyrǵan Іshki ister mınıstri Marat Ahmetjanov lýdomanııa máselesin kóterdi, dep habarlaıdy QazAqparat tilshisi.

«Ulttyq statıstıkaǵa sáıkes, 2019 jylmen salystyrǵanda byltyr qumar oıyndar men bás tigý qyzmetteriniń kólemi 40 esege ósti. Sońǵy 2 jylda qumar oıyndar naryǵy jyljymaıtyn múlik naryǵyn basyp ozyp, qazaqstandyqtar eń kóp jumsaıtyn jetekshi orynǵa ıe boldy. Bıylǵy jyldyń birinshi toqsanynda ǵana halyqtyń shyǵyny 100 mlrd teńgeden asty. Bul kitaphanalar men murajaılarǵa qaraǵanda 70 ese, shyǵarmashylyq pen ónerge qaraǵanda 50 ese, IT qyzmetterine qaraǵanda 5 ese jáne jyljymaıtyn múlik operatsııalaryna qaraǵanda 2 ese kóp», - dedi Marat Ahmetjanov.

Mınıstr qazir bul baǵyttaǵy jarnama kez kelgen onlaın-platformada qoljetimdi ekenin atap ótti. Bul óz kezeginde máseleniń keń óris alýyna seep bolyp otyr.

«Búginde eshkim lýdomanııa máselesimen aınalyspaıdy. Salyq organdary tek salyq tóletýge múddeli. Jergilikti atqarýshy organdarǵa bıýdjetke túsetin túsimder mańyzdy. Kásipkerler kiristi «qýady». Nátıjesinde halyq zardap shegedi: azamattar múlikterin salyp, nesıe alady. Artynan ajyrasady, jumysynan aıyrylady, qylmysqa barady, ómirmen esep aıyrysady», - dep másele kóterli vedomstvo basshysy.

Atalǵan problemalardy sheshý úshin mınıstr ozyq halyqaralyq tájirıbeni negizge alýdy usyndy. Marat Ahmetjanov mundaı jańashyldyqtardy birinshi kezekte elordaǵa engizý kerek dep esepteıdi.