Jyl basynan beri Qazaqstandaǵy baspana quny 1,7% tómendegen
ASTANA. QazAqparat - Jyl basynan beri Qazaqstandaǵy baspana quny 1,7% tómendedi, dep habarlady QR Ulttyq ekonomıka mınıstrligi.
«2016 jyldyń tamyz aıynda ótken aımen salystyrǵanda jańa turǵyn úılerdi satý baǵasy 0,2%-ǵa tómendep, sharshy metri 252 198 teńgeni qurady, 2015 jyldyń jeltoqsan aıymen salystyrǵanda - 1,7% kemigen», - delingen habarlamada.
Sonymen birge, 2016 jyldyń qańtar-shilde aılaryndaǵy kópqabatty úı qurylysynyń naqty shyǵyny 1 sharshy metrine 122 500 teńge bolǵan.
«2016 jyly 7 aı ishinde respýblıka boıynsha jalpy aýmaǵy 5,7 mıllıon sharshy metrden asatyn 48 986 páter paıdalanýǵa berildi. Onyń 245,9 myń sharshy metri - jaldamaly, 190,3 myń sharshy metri - nesıelik turǵyn úı. Statıstıkalyq málimetterge sáıkes, 2 942 947 adam baspanamen qamtamasyz etildi. 2015 jyldyń 7 aı merzimimen salystyrǵanda, turǵyn úılerdi paıdalanýǵa berý kólemi 17,5% ulǵaıǵan»,- delingen habarlamada.
Turǵyn úı qurylysy boıynsha Astana kósh bastap tur, onda 1,3 mıllıon sharshy metr aýmaq nemese 12 myń páter qoldanýǵa berilgen. Ekinshi orynda Almaty - 7886 páter berilgen. Eń az kórsetkish Soltústik Qazaqstan oblysyna tıesili - 44,6 myń sharshy metr nemese 337 páter salynǵan.
Tamyz aıynda abattandyrylǵan jáne abattandyrylmaǵan turǵyn úılerdi alyp satý baǵalary shilde aıymen salystyrǵanda ózgermegen, abattandyrylǵan úıdiń sharshy metri 191 370 teńge, abattandyrylmaǵan úı - 115 438 teńge.
Tamyz aıyndaǵy abattandyrylǵan turǵyn úıdi jalǵa alý quny shilde aıymen salystyrǵanda 0,4% kóterilip, sharshy metri 1277 teńge bolǵan.
