Jyl basynan beri Qazaqstanda turǵyn úı baǵalary joǵarylady - Statıstıka komıteti
ASTANA. QazAqparat - Jyl basynan beri Qazaqstanda turǵyn úı baǵalary joǵarylady. Bul týraly búgin Ortalyq kommýnıkatsııalar qyzmetinde ótken brıfıngte QR Ulttyq ekonomıka mınıstrliginiń Statıstıka komıtetiniń tóraǵasy Álıhan Smaıylov málim etti.
"Jańa turǵyn úılerdi paıdalanýǵa berý kórsetkishi 20 paıyzǵa ósip otyr. Paıdalanýǵa berilgen úıdiń jalpy kólemi 2 mln. 702 sharshy metrdi qurady. Onyń 1,9 mıllıony - jeke turǵyn úıler, 800 myń sharshy metri - kóppáterli úıler. Jyl basynan beri teńge boıynsha turǵyn úı baǵalary 1,8 paıyzǵa ósti, naýryz aıynda jalpy el boıynsha ortasha eseppen sharshy metrine 225 myń teńgeni qurady. Degenmen dollarmen eseptegende, páter baǵasy birshama túsken. Teńgemen shaqqanda, turǵyn úı baǵalary Atyraýda kóbirek joǵarylaǵan. Sońǵy úsh aıda onda turǵyn úı baǵasy 10 paıyzǵa kóterildi. El boıynsha eń qymbat úıler Astanada - sharshy metrine 303 myń teńge, Almatyda - 287 myń teńge, Atyraýda - 271 myń teńge. Al eń tómeni Jezqazǵan, Taraz jáne Taldyqorǵanda tirkeldi - sharshy metrine 90 myń teńge", - dedi ol.
Onyń sózine qaraǵanda, qańtar-naýryzda qozǵalmaıtyn múlik naryǵy jandana túsken. Osy aralyqta 35 209 satý jáne satyp alý kelisimsharty jasalǵan jáne byltyrǵy jylmen salystyrǵanda 5,5 paıyzǵa ósken. Kelisimsharttardyń eń kóbi Astana jáne Almatyda jasalady.
