Jyl basynan beri Qazaqstanda 9 myńnan astam órt boldy

NUR-SULTAN. QazAqparat – Jyl basynan beri Qazaqstanda 9 myńnan astam órt boldy jáne 300-ge jýyq adam qaza tapty. Bul týraly QR Tótenshe jaǵdaılar mınıstrligi Órtke qarsy qyzmet komıtetiniń tóraǵasy Nurbolat Derbisov aıtyp berdi, dep habarlaıdy QazAqparat tilshisi.

«Kún saıyn bizdiń bólimshelerimiz ártúrli sıpattaǵy tótenshe jaǵdaılardy joıý úshin 100-150 ret tapsyrmaǵa shyǵady. Árıne, olardyń negizgi úlesi órtti sóndirýge tıesili. Jyl basynan beri 10 aıda el boıynsha 9 myńnan astam órt boldy. Onda jaraqattanǵandar sany 358 adamdy, qaza bolǵandar sany 297 adamdy qurady. Al 4 394 adam qutqaryldy», - dedi N. Derbisov Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, jalpy, órt kólemi 8%-ǵa, turǵyn úı sektoryndaǵy órt kólemi 13,6%-ǵa tómendegeni baıqalady.

«Degenmen, órt sanynyń jalpy tómendeýi kezinde de qaza tapqandar sany 16%-ǵa, jaraqat alǵandar sany 45%-ǵa ósti», - deıdi Nurbolat Derbisov.