Jyl basynan beri Qarjy polıtsııasy sybaılas jemqorlyq pen kóleńkeli ekonomıkanyń deńgeıin tómendetýge baǵyttalǵan 350 profılaktıkalyq shara júrgizdi
ASTANA. 24 qazan. QazAqparat - Aǵymdaǵy jylǵy 9 aıda qarjy polıtsııasy organdarymen sybaılas jemqorlyq pen kóleńkeli ekonomıkanyń deńgeıin tómendetýge baǵyttalǵan 350 profılaktıkalyq sharalar júrgizildi. Bul týraly vedomstvonyń baspasóz qyzmeti habarlaıdy.
Vedomstvonyń málimetinshe, memlekettik qyzmetkerler arasyndaǵy jemqorlyqtyń aldyn-alý maqsatynda memlekettik organdarǵa sybaılas jemqorlyqtyń sebepteri men jaǵdaılaryn joıý týraly 326 usynys jiberildi, olar boıynsha 264 laýazymdy tulǵa tártiptik jaýapkershilikke tartyldy, 127-si jumystan shyǵaryldy.
Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasynyń) tóraǵasy Rashıd Túsipbekov vedomstvonyń jedel-tergeý bólimshelerimen ótkizgen májiliste azamattar men memleket múddesine zalal keltirmesten buryn, ıaǵnı qylmystardyń jolyn alǵashqy satylarda kesýdiń ótken jyldan bastap qabyldanǵan jańa ádisteri men tásilderi kútken nátıjelerdi bere bastaǵanyna jáne bul baǵyttaǵy jumystyń júıeli sıpatqa ıe bola bastaǵanyna toqtaldy.
Máselen, Agenttikte qurylǵan memlekettik organdar men ulttyq kompanııalardyń memlekettik satyp alý josparlaryn kún saıyn qarap otyratyn Ahýaldyq ortalyqtyń qyzmeti 3,2 mlrd. teńge bıýdjet qarajatyn maqsatsyz paıdalanýdan saqtap qaldy.
Oǵan qosa, jyl basynan beri taldaý materıaldarynyń negizinde zalal kólemi 105 mlrd. teńgeni quraǵan 467 qylmystyq is qozǵaldy.
