Jyl basynan beri kámeletke tolmaǵandar jasaǵan qylmys kórsetkishi 27 paıyzǵa tómendedi
ASTANA. QazAqparat - Jyl basynan beri kámeletke tolmaǵandar jasaǵan qylmys kórsetkishi 27 paıyzǵa tómendedi. Búgin Astanadaǵy Ortalyq kommýnıkatsııalyr qyzmetinde ótken brıfıngte Іshki ister mınıstrligi Ákimshilik polıtsııa komıtetiniń bólim bastyǵy Áset Ospanov osylaı málim etti. Brıfıng qylmystyq qastandyqtan bala quqyǵyn qorǵaý sharalaryna arnalǵan bolatyn.
Aıta keterligi, sońǵy jyldary bala quqyqtaryn qorǵaýǵa baǵyttalǵan birqatar zańnamalar qabyldanǵan. Máselen, kámeletke tolmaǵandardyń túngi ýaqytta oıyn-saýyq oryndarynda bolǵany úshin mekeme ıesin jaýapkershilikke tartý, sonymen qatar, balalarǵa qatysty nápsiqumarlyq áreketterge barǵandar úshin jaza da qataıtylǵan. Qylmystyq saıasatty izgilendirý úshin urlyq, tonaý jáne bopsalaý qylmystaryna qatysty jazaǵa tartý jasy 14-ten 16 jasqa deıin uzartylǵan.
«Qabyldanǵan sharalar nátıjesinde sońǵy on jylda kámeletke tolmaǵandar arasyndaǵy qylmys ortasha alǵanda alty paıyzǵa tómendep otyr. Aǵymdaǵy jyldyń alty aıynda tómendeý deńgeıi 27 paıyzdy qurady. Sonyń ishinde kámeletke tolmaǵandardyń aýyr jáne asa aýyr qylmys jasaý kórsetkishteri aıtarlyqtaı azaıdy, máselen kámeletke tolmaǵandardyń kisi óltirý qylmysy 5 esege, tonaý 4 esege, densaýlyǵyna aýyr zalal keltirý men zorlyq 3 esege tómendedi», - dedi Áset Ospanov.
