Jyl basynan beri ıtterin tumyldyryqsyz serýenge shyǵarǵan 1300-den astam elordalyqqa aıyppul salyndy
ASTANA. QazAqparat - Astana qalasy máslıhatynyń depýtattary qurylys, ekologııa, kólik, saýda jáne turǵyn úı-kommýnaldyq sharýashylyq boıynsha turaqty komıssııanyń otyrysynda úı janýarlaryn qala aýmaǵynda ustaý erejelerin talqylady.
Astana qalasy Aýylsharýashylyq basqarmasynyń basshysy Áset Qurmanǵalıev halyq qalaýlylaryn úı janýarlaryn Astana qalasynda ustaý boıynsha vedomstvoda bekitilgen erejelermen tanystyrdy.
- Jyl basynan beri úı janýarlaryn ustaý erejelerin buzǵany úshin 1329 adam ákimshilik jazaǵa tartylyp, jalpy somasy 700 myń teńge kóleminde aıyppul tóledi. Zertteý nátıjesi kórsetkendeı, negizinen ıtterdi tumyldyryqsyz syrtqa shyǵarý sekildi buzýshylyqtar kóptep tirkelýde. Ieleriniń janýarlarǵa durys qaramaýy saldarynan qalada qaraýsyz qalǵan úı janýarlary kóbeıýde, - dedi. Á. Qurmanǵalıev.
Onyń aıtýynsha, Astanada úı janýarlaryn shyǵarýǵa, serýendetýge laıyqtalǵan arnaıy oryn joq. Halyq qalaýlylary osy suraqtardy turǵyndarmen, PIK múshelerimen, elordalyq kınologııa qyzmetterimen birlese otyryp sheshýge usynys jasady.
Qalalyq máslıhattyń hatshysy Sansyzbaı Esilov úı janýarlary ıelerinen tazalyq saqtaýdy, qaýipsizdik erejelerin saqtaýdy talap etý kerektigin basa aıtty.
